ბათუმის სამშობიარო სახლში კორონავირუსით ინფიცირებული ორსულების რაოდენობა 30-მდე გაიზარდა. როგორც კლინიკის ექიმი ნუგზარ პაპავა ჟურნალისტებთან საუბრისას აცხადებს, მათი მდგომარეობა სტაბილურია.
მისი ინფორმაციით, კლინიკაში 7 ახალშობილი იმყოფება, აქედან ორი კორონავირუსი არის ინფიცირებული.
„დღეს დილით კოვიდინფიცირებულმა პაციენტმა იმშობიარა. არანაირი გართულება არ ყოფილა. დედაც და ახალშობილიც თავს კარგად გრძნობენ. იცით, რომ იმ დღესვე ახალშობილს ტესტირება არ უტარდება. სავარაუდოდ, ხვალ აუღებენ ნიმუშებს კვლევისათვის და უახლოეს დღეებში გვეცოდინება. საბედნიეროდ არ გვყავს მძიმე პაციენტი. არც ერთს არ აღენიშნება კორონავირუსისთვის დამახასიათებელი ნიშნები.
ამ ეტაპზე არ გვაქვს ადგილები, თუმცა დღეს ვგეგმავთ რამდენიმე პაციენტის გაწერას და ამის შემდეგ, საჭიროების შემთხვევაში, შევძლებთ ახალი ინფიცირებულების მიღებას"- აცხადებს ნუგზარ პაპავა.