„ევროპული საქართველოს“ ახალგაზრდულმა ორგანიზაციამ ტელეკომპანია „იმედის“ წინ საპროტესტო აქცია გამართა. ამის შესახებ ინფორმაციას „ევროპული საქართველოს“ პრესსამსახური ავრცელებს.

„ევროპული საქართველოს“ ახალგაზრდა სპიკერის, თათია ვახტანგაძის თქმით, ტელეკომპანია „იმედი“ არღვევს კანონს, რომელიც ავალდებულებს, რომ გაუშვან პოლიტიკური რეკლამა მათ ეთერში.

მისივე განცხადებით, „ევროპული საქართველოს“ საარჩევნო კლიპში, ნეგატიურ კონტექსტში არიან მოხსენიებული, როგორც ბიძინა ივანიშვილი, ასევე მიხეილ სააკაშვილი.

„დღეს აქ მოვედით იმის საჩვენებლად, რომ ტელეკომპანია „იმედი“ არღვევს კანონს, რომელიც ავალდებულებს მას, რომ გაუშვას პოლიტიკური რეკლამა, ყველამ კარგად ვიცით, რომ ბიძინა ივანიშვილის ინტერესია, რომ ყველა ოპოზიციური პარტია „ნაციონალურ მოძრაობად“ მონათლოს. ჩვენი კლიპის მიზანიც სწორედ ის იყო, რომ ეჩვენებინა ეს განსხვავებები, რომ ივანიშვილი არის ძალა, რომელსაც სურს არსებული ჭაობის შენარჩუნება და მიხეილ სააკაშვილი გვექაჩება წარსულისაკენ, 2012 წლამდე მდგომარეობისაკენ. ამ სიმართლის გაშუქება არ შედის „იმედისა“ და ივანიშვილის ინტერესებში და სწორედ ამიტომ მოვედით და ჩვენ გავაშუქეთ ტელეკომპანია „იმედთან“ ეს კლიპი“, - განაცხადა თათია ვახტანგაძემ.