წინასაარჩევნო კამპანიის ფარგლებში, "ერთიანი საქართველოს" ლიდერი ნინო ბურჯანაძე პარტიის პოლიტსაბჭოს წევრებთან ერთად, კახეთში ამომრჩეველს შეხვდა. ამის შესახებ „ინტერპრესნიუსს“ „ერთიანი საქართველოს“ პრესსამსახურიდან აცნობეს.

მათი ინფორმაციით, ნინო ბურჯანაძემ გურჯაანის და თელავის ამომრჩევლებს საარჩევნო პროგრამა გააცნო. მან ასევე ადგილობრივებისგან მოისმინა რეგიონში არსებული პრობლემები და გამარჯვების შემთხვევაში, მათ მოგვარებას დაპირდა.

ბურჯანაძის თქმით, კახეთის ძირითად პრობლემად ყურძნის ფასი რჩება, რაც რეგიონში სიდუხჭირეს და ეკონომიკურ კრიზისს იწვევს.

"ხელისუფლებას ამ ხალხისთვის არ სცალია. ხელისუფლებას ისინი ახსენდება მხოლოდ არჩევნების წინ. რთველის დროს ადეკვატური ფასი არ არის ყურძენზე, მოსავლის აღება პრობლემაა, არანაირი ყურადღება არ აქვთ ბინათმშენებლობით დაზარალებულ ადამიანებს, არ აქვთ სასმელი წყალი, სარწყავ სისტემაზე საუბარი საერთოდ ზედმეტია. ადგილობრივი ხელისუფლება საერთოდ არაფერს აკეთებს”, - განაცხადა ნინო ბურჯანაძემ.