საქართველოში კორონავირუსის 919 ახალი შემთხვევიდან 21 შიდა ქართლში დადასტურდა. შიდა ქართლის გუბერნატორის მოვალეობის შემსრულებელის, სიმონ გულედანის ინფორმაციით, ახალ შემთხვევებს შორის 4 არასრულწლოვანია.
„გასული 24 საათის განმავლობაში, შიდა ქართლში კორონავირუსის 21 ახალი შემთხვევა დადასტურდა, აქედან 18 პირი რეგიონში მცხოვრებია. მათ შორის, კორონავირუსი კასპის მუნიციპალიტეტის სოფლების - იგოეთისა და ახალქალაქის სკოლების პედაგოგს დაუდასტურდა. ორივე სკოლა უკვე გადავიდა დისტანციურ სწავლებაზე. სამწუხაროდ, ახალ შემთხვევებს შორის 4 არასრულწლოვანია.
სულ, რეგიონის მასშტაბით, ონლაინ სწავლებაზე 5 სკოლაა გადასული. 3 ბაღის გახსნა კი სწორედ ვირუსის გამო გადაიდო. კოვიდინფიცირებულთა ნაწილი მკურნალობას სახლში, ნაწილი კი - კოვიდკლინიკებში განაგრძობს“, - განაცხადა შიდა ქართლის გუბერნატორის მოვალეობის შემსულებელმა.
რეგიონის მასშტაბით, მთლიანობაში, კორონავირუსის 138 დადასტურბული შემთხვევაა გამოვლენილი. ამ დროისთვის, თვითიზოლაციაში 617 პირი იმყოფება.