ხელვაჩაურის მერიასთან აქციაზე ერთი პირი შეუძლოდ გახდა
ხელვაჩაურის მერის ჯუმბერ ვარდმანიძის მიერ მერიის შენობის დატოვებას აქციის მონაწილეების ხმაური მოჰყვა.
ხელვაჩაურის მერიის შენობასთან სტიქიის შედეგად დაღუპულთა ოჯახის წევრები საპროტესტო აქციას მართავენ.
აქციის მონაწილეები ხელვაჩაურის მერს მანქანით გადაადგილების საშუალებას არ აძლევდნენ. აქციაზე მყოფი ერთი პირი შეუძლოდ გახდა, მას სასწრაფო სამედიცინო დახმარება ადგილზე აღმოუჩინეს. თავად ჯუმბერ ვარდმანიძემ კი ტერიტორია დატოვა.
როგორც აქციის მონაწილეები აცხადებენ, ისინი ხელვაჩაურის მერის ჯუმბერ ვარდმანიძის კაბინეტის კარის აჭედვას გეგმავენ.
შეგახსენებთ, რომ აქციის მონაწილეების მთავარი მოთხოვნაა, ხელვაჩაურის მერის ჯუმბერ ვარდმანიძისა და გეოლოგიური სამსახურის თანამშრომელთა პასუხისმგებლობაში მიცემა. აქციის მონაწილეები აცხადებენ, რომ სოფელ ჯოჭოში დაზარალებული ოჯახის თხოვნის მიუხედავად, სტიქიის ზონა სათანადოდ არ შეისწავლეს, რამაც ერთი ოჯახის სამი წევრის დაღუპვა გამოიწვია.
ჯუმბერ ვარდმანიძე განმარტავს, რომ ტერიტორიის შესასწავლად ხელვაჩაურის მერიაში განცხადება არ შესულა.
