პარლამენტის იურიდიულ საკითხთა კომიტეტის თავმჯდომარის, ანრი ოხანაშვილის განცხადებით, კორონავირუსის შემთხვევების მატების მიუხედავად, 2020 წლის საპარლამენტო არჩევნების თარიღის გადადებაზე მმართველ გუნდში საკითხი არ განხილულა და არც განიხილება.

როგორც ოხანაშვილმა ჟურნალისტებს განუცხადა, „ქართული ოცნებისთვის" უმთავრესი საზოგადოების ჯანმრთელობისა და სიცოცხლის დაცვაა, ამიტომ პარტია მისი გეგმის ფარგლებში ზრუნავს იმაზე, რომ საზოგადოებამ არჩევნებამდე და არჩევნების დღესაც მაქსიმალურად უსაფრთხოდ იცხოვროს.

მისი თქმით, არჩევნების დღეს გატარდება ყველა ზომა და დაკმაყოფილდება ყველა საერთაშორისო სტანდარტი, იმისათვის, რომ არჩევნები უსაფრთხოდ ჩატარდეს და თითოეულ მოქალაქეს მიეცეს ხმის მიცემის შესაძლებლობა.

როგორც ოხანაშვილმა აღნიშნა, ისინი ვინც არჩევნების გადადებაზე საზოგადოებაში საკითხის შემოტანას ცდილობენ, გულწრფელები არ არიან და რეალურად, საზოგადოების ჯანმრთელობა არც აწუხებთ.

„ოპოზიციური ჯგუფები, რომლებსაც საზოგადოების მხარდაჭერის კუთხით პულსი არ ესინჯებათ და წუხან იმაზე, რომ შესაძლოა ვერ მოხვდნენ პარლამენტში, მაგალითად როგორიცაა „ლელო" და ა.შ. ეს ადამიანები ახლა ცდილობენ, საზოგადოებაში, მედიაში თითქოს თემა შემოიტანონ - ხომ არ გადაიდოს არჩევნები. მათ ჩვენი საზოგადოების ჯანმრთელობა კი არ აწუხებთ, არამედ წლების განმავლობაში არაერთი მათგანი საზოგადოების საწინააღმდეგო მოქმედებებით იყო დაკავებული", - განაცხადა ანრი ოხანაშვილმა.