„ევროპული საქართველოს“ ერთ-ერთი ლიდერის, ფოთის, ხობისა და სენაკის მაჟორიტარობის კანდიდატის გიგა ბოკერიას განცხადებით, ივანიშვილი ერთი წელია ცდილობს გახარიასგან წარმატებული მენეჯერის სახე შექმნას, თუმცა “ყველა მნიშვნელოვან მომენტში გახარიამ მოქალაქეებისა და ადამიანის უფლებების საზიანო გადაწყვეტილება მიიღო“.

მისივე თქმით, როგორც ივანიშვილი და გახარია, ისე „ენმ“-ის ლიდერები, სააკაშვილი და ვაშაძე თავს არიდებენ პოლიტიკურ დებატებში მონაწილეობას.

ბოკერიამ აღნიშნა, რომ “ევროპული საქართველოს“ ყველა ლიდერი მზადაა, შედგეს პოლიტიკური დებატები „ენმ“-ის “ქართული ოცნებისა“ და “ევროპული საქართველოს“ ლიდერებს შორის.

„გუშინ ფოთში გახარია ჩამოვიდა და ივანიშვილის რეჟიმის რვაწლიანი მმართველობის ბოლოს საზეიმოდ განაცხადა, რომ შემდეგი ოთხი წელი ფოთის და სამეგრელოს აღმშენებლობის პერიოდი იქნება. ამ პოლიტიკური „კლოუნისგან“ ივანიშვილის მთავრობა ერთი წელია ცდილობს წარმატებული მენეჯერის სახე შექმნას. იმის მაგივრად მეორე ტალღისთვის მომზადებულიყვნენ, კოვიდ პანდემიის დროს სწორედ ამაში დაიხარჯა უზარმაზარი ფინანსური და პოლიტიკური რესურსი.

არადა გახარიამ მისი მოკლე პოლიტიკური კარიერის მანძილზე, ყველა კრიტიკულ ვითარებაში ან არაკომპეტენტურობა და გულგრილობა გამოავლინა ან პირდაპირ კრიმინალური ქმედება ჩაიდინა. პანკისის ოპერაცია, რომელიც პოლიციის მანქანების დაწვით დასრულდა, საპრეზიდენტო არჩევნებზე სამეგრელოს შტაბის ხელმძღვანელობისას იქ შექმნილი კლიმატი და განსაკუთრებით მასწავლებლებზე და დირექტორებზე სამარცხვინო ზეწოლა, რისი მაგალითიც ია კერზაიას ტრაგედიაა, სხვადასხვა დროს პროპუტინური ფაშისტური ჯგუფების ოპონენტებზე მიქსევის სამარცხვინო პრაქტიკა, ოთხოზორია-ტატუნაშვილის სიაზე სრული უმოქმედობა და ამ თემის უტიფრად უგულებელყოფა, მათი არდასჯა ვინც ხორავას ქუჩის საქმეზე დამნაშავეებს შეგნებულად ხელი დააფარა, გავრილოვის ქვეყანაში შემოშვება და 20 ივნისის ღამის დარბევა - ყველა ამ ეპიზოდში ივანიშვილის რეჟიმმა და კერძოდ, გახარიამ ყველაფერი ქვეყნის და ჩვენი მოქალაქეების ინტერესების და უფლებების საზიანოდ გააკეთა.

ივანიშვილის ეს კლოუნი დღეს კვლავ პრემიერობის კანდიდატია, ისე რომ არცერთ პოლიტიკურ დებატებში მონაწილეობა არ მიუღია. დებატებზე უარს ამბობს გახარია და მისი უფროსიც, ქვეყნის რეალური მმართველი ივანიშვილი. სხვათა შორის დებატებში მონაწილეობას თავიდან ირიდებს "ერთიანი ნაციონალური მოძრაობაც" - არც პრემიერობის კანდიდატი სააკაშვილი და არც პარტიის თავმჯდომარე ვაშაძე დებატებში მონაწილეობას არ იღებენ.

"ევროპული საქართველო" და მისი ყველა ლიდერი ახლაც მზად ვართ რომ ასეთ დებატები შედგეს - "ოცნების", "ენმ"-ს და "ევროპული საქართველოს" ლიდერებს შორის“, - განაცხადა გიგა ბოკერიამ.