ზუგდიდის საოლქო საარჩევნო კომისიის თავმჯდომარის მირანდა მესხის ინფორმაციით, პანდემიის ფონზე არჩევნებზე კარგი აქტივობაა.

მისი განცხადებით, 15:00 საათისთვის აქტივობა არის 30,4% , რაც რაოდენობრივად შეადგენს 36 137 ამომრჩეველს. მესხის თქმით, ამ ეტაპისთვის ფიქსირდება 9 საჩივარი, რომელზეც რეაგირება უკვე ხდება უბნებზე. მესხის განმარტებით, აღნიშნული საჩივრები ძირითადად ტექნიკური ხასიათის გადაცდომებს შეიცავს,რაც კენჭისყრის შედეგებზე გავლენას არ იქონიებს.

"საჩივრების ავტორთაგან ზოგი არის არასამთავრობო ორგანიზაციის დამკვირვებელი, ზოგი საარჩევნო სუბიექტის წარმომადგენელი. მათი მხრიან ფიქსირდება, რომ გადასატანი ყუთის გაყოლასთან დაკავშირებით ფუნქციის შესრულებაზე უარია ნათქვამი. ასევე 89-ე უბანთან მიმართებით რამდენიმე ორგანიზაციის მიერ საჩივარია შემოტანილი, რომ 39-მა ამომრჩეველმა მონაწილეობა მიიღო მხოლოდ ერთი სახის ბიულეტენით. ამ ეტაპზე სიმშვიდეა. ყველა უბანი მოქმედებს სანიტარულ-ჰიგიენური ნორმების დაცვითადა კანონის შესაბამისად", - განაცხადა მესხმა.

ამასთან, მან უპასუხა "ევროპული საქართველოს" წარმომადგენლის ბესიკ დონაძის მიერ გაკეთებულ განცხადებას, რომლის მიხედვითაც 46-ე საარჩევნო უბანზე ბიულეტენები ძირს იყო დაყრილი,რაც კანონდარღვევაა. მირანდა მესხი განმარტავს, რომ აღნიშნული უბანი უკვე მოკვლეულია და დადგენილია, რომ ეს ბიულეტენები უყურადღებოდ მიტოვებული არ იყო.