დიდუბე-ჩუღურეთის დამოუკიდებელი მაჟორიტარი დეპუტატობის კანდიდატმა ანა დოლიძემ სოციალური ქსელით გაერთიანებული ოპოზიციის კანდიდატს ზურაბ ჯაფარიძეს მიმართა. დოლიძე კითხულობს, სად იყო გუშინ და დღეს ზურაბ ჯაფარიძე, როდესაც თავად ორი დღეა არჩევნების გაყალბებაზე საუბრობს.

„გუშინ დილის 8 საათიდან მოყოლებული ეთერებში და უბან-უბან დავდივარ არჩევნების ფართომასშტაბიან გაყალბებაზე ყვირილით. ვიჩხუბეთ, ვიდავეთ, დავწერეთ საჩივრები, ყველაზე მეტი საჩივარი ოლქში! დღეს ვიყავი რამდენიმე ეთერში და ღიად დავაფიქსირე, რომ არჩევნები ფართომასშტაბურად გაყალბდა. რას აკეთებს ამ დროს ჩემი ერთ-ერთი კონკურენტი ზურაბ ჯაფარიძე. დაუწია ტონს, საუბრობს "კონსულტაციებზე", რომელიც უნდა გაგრძელდეს, ანგარიშებზე, რომელსაც უნდა დაველოდოთ და ეს საეჭვოდ ემთხვევა ცესკო-ს მიერ შედეგების 24-საათიან დაგვიანებას ჩემს ოლქში. ვითომ ეს დამთხვევაა? არა მგონია“ , - წერს ანა დოლიძე სოციალურ ქსელში.