ქობულეთში 81-ე საოლქო საარჩევნო კომისიის სხდომაზე ხმაური იყო. ერთმანეთს სიტყვიერად საოლქო კომისიის წევრები და "ერთიანი ნაციონალური მოძრაობის" წარმომადგენლები დაუპირისპირდნენ.
როგორც "ნაციონალური მოძრაობის" წევრები აცხადებენ, შედგენილ ოქმებში დისბალანსი და საარჩევნო უბნებთან გადაყრილი ბიულეტენები აღმოაჩინეს, რაზეც შესაბამის უწყებას სამართლიანი რეაგირებისკენ მოუწოდებდნენ.
ამასთან ოპოზიციის წევრები კონკრეტულ უბნებზე ხმების ხელახლა გადათვლას მოითხოვდნენ, რადგან მიაჩნიათ, რომ არჩევნები გაყალბდა.
81-ე საოლქო საარჩევნო კომისიის იურისტი აცხადებს, რომ "ერთიანი ნაციონალური მოძრაობის" პრეტენზიები პროვოკაციული ხასიათისაა და შინაარსს მოკლებულია.
მათივე თქმით, ხმებს კონკრეტულ უბნებზე ხელახლა ვერ დაითვლიან, რადგან დღის წესრიგში სხვა საჩივრების განხილვისთვის არის დრო განსაზღვრული.
ქობულეთში 81-ე საოლქო საარჩევნო კომისიასთან სამართალდამცავები რჩებიან, სიტუაცია ამ დროისათვის განმუხტულია.