ბათუმში 79-ე საოლქო საარჩევნო კომისიასთან გაერთიანებული ოპოზიციის წევრების, აქტივისტებისა და მოძრაობა "იმოქმედეს" წარმომადგენლების მიერ ორგანიზებული აქცია დასრულდა.

ამ დრომდე 79-ე საოლქო საარჩევნო კომისიასთან რჩებიან სამართალდამცავები.

საოლქო საარჩევნო კომისიაში სხდომა 21:00 საათზე დაიწყო და ამ დრომდე გრძელდებოდა, სადაც საჩივრებს განიხილავდნენ.

ოლქში 40-მდე საჩივარი იყო შეტანილი, რომელთა უმრავლესობა კომისიამ არ დააკმაყოფილა. სხდომის პარალელურად 79-ე საოლქო საარჩევნო კომისიასთან გაერთიანებული ოპოზიციის წევრები აქციას მართავდნენ, მათ მიაჩნიათ, რომ ბათუმის 79-ე ოლქი არჩევნების მასშტაბურ გაყალბებაში მონაწილეობას იღებს. ისინი სხდომის დასწრებაზე ნებართვას ითხოვდნენ, თუმცა სამართალდამცავებმა შენობაში არ შეუშვეს.

სამართალდამცავებსა და აქციის მონაწილეებს შორის დაპირისპირებისას ერთ-ერთი კომერციული ფართის მინა დაზიანდა, რის შედეგადაც 5 ადამიანი მსუბუქად დაშავდა.