„ქართული ოცნების“ საარჩევნო სიის წევრის, შალვა პაპუაშვილის განცხადებით, არჩევნების გაყალბებასთან დაკავშირებით დეზინფორმაცია ვრცელდება. როგორც მან დღევანდელ ბრიფინგზე განმარტა, ტყუილია, თითქოს ცესკო-მ საპარლამენტო არჩევნების პირველადი შედეგების გამოქვეყნება დააგვიანა.
„თითქოს სიყალბესთან ბრძოლის კამპანია მიდის, მაგრამ ტყუილით და მინდა რამდენიმე ციფრი დაგისახელოთ. პირველი, რომ ცესკო-მ პირველადი შედეგების გამოქვეყნება დააგვიანა, რაც გახლავთ ტყუილი. 2012 წლის საპარლამენტო არჩევნების დროს პირველადი მონაცემების გამოქვეყნებას დასჭირდა 8 საათი, ადგილობრივი თვითმართველობის არჩევნების დროს 7 საათი, წელს დასჭირდა 7,5 საათი. ეს არის ის ტრადიციული დრო, რაც ცესკო-ს პირველადი შედეგების გამოსავლენად სჭირდება. ბათილ ბიულეტენებთან დაკავშირებითაც 60-80 ათასი ბიულეტენი არის ბათილი, გადახედეთ ნებისმიერი არჩევნების სტატისტიკას საქართველოში, ყოველ არჩევნებში არის ის, რომ ზოგი არასწორად შემოხაზავს, შესაძლოა, ზოგმა კონვერტის გარეშე ჩააგდოს. ბათილობის პროცესი 3-4% ყოველთვის არის. ამიტომ, ესეც ტყუილია. შესწორების ოქმები თითქოს ჭარბად მეტიაო, ესეც ტყუილია. ყოველ არჩევნებში არის ხოლმე 1000-1500 შესწორების ოქმი“,-განაცხადა პაპუაშვილმა.