აჭარის მთავრობის თავმჯდომარე თორნიკე რიჟვაძე კვირას ოპოზიციის მიერ დაგეგმილ აქციას გამოეხმაურა. თორნიკე რიჟვაძემ მოსახლეობას მოუწოდა, რომ რეგიონში მძიმე ეპიდემიოლოგიური მდგომარეობაა და ჯანდაცვის რეკომენდაციები გაითვალისწინონ, რადგან ჯანდაცვის სისტემის შესაძლებლობები ზღვარზეა.

"გაურკვეველ აქციებს გეგმავენ, დღესაც და მომავალშიც გარანტირებული იქნება თითეული მოქალაქის გამოხატვის თავისუფლება, თუმცა კანონმდებლობის ჩარჩოში. ამ კონკრეტულ ქუჩის აქციებში მონაწილე ადამიანებს უმორჩილესად ვთხოვ, ეპიდემიოლოგების მოწოდებები დაიცვან, ვინაიდან რეგიონში, ქალაქში გვაქვს მძიმე ეპიდემიოლოგიური ვითარება. ყოველდღიურად ვართ ზღვარზე, როგორც ჯანდაცვის სისტემის შესაძლებლობების, ასევე სიკვდილიანობის ნაწილში. ყველა მოქალაქის გადასაწყვეტია ვინ, რომელ პოლიტიკურ აქციაში მიიღებს მონაწილეობას, თუმცა ვთხოვ, მაქსიმალურად დაიცვან წესები, არავითარი პრობლემა არ გვაქვს ქუჩის აქციებთან და არც სხვა ნებისმიერ გამოხატვასთან, პატივი ვცეთ ადამიანების ჯანმრთელობას და სიცოცხლეს. ამ ყველაფერს პოლიტიკური პარტიები სათავისოდ იყენებენ და ადამიანების სიცოცხლეს როგორც ჩანს, მათთვის დიდი ფასი არ აქვს. ყველა სადამკვირვებლო ორგანიზაციები აღიარებენ, რომ ქვეყანაში არჩევნები სამართლიან და კონკურენტუნარიან გარემოში ჩატარდა, შედეგი დადგა ის, რომ "ქართულმა ოცნებამ" მოსახლეობის უმრავლესობის ნდობა მიიღო",- აღნიშნა რიჟვაძემ.