ზუგდიდში თანამედროვე სტანდარტების შესაბამისი ავტოპარკი შენდება. ამის შესახებ ინფორმაციას ზუგდიდის მუნიციპალიტეტის მერია ავრცელებს. ავტოპარკის მოწყობის სამუშაოებს ზუგდიდის მერის პირველი მოადგილე გიგა ფარულავა გაეცნო.

როგორც მერის მოადგილემ აღნიშნა, ზუგდიდის მუნიციპალიტეტს მალე 25 ახალი ავტობუსი ეყოლება.

„ვაშენებთ ახალ, თანამედროვე სტანდარტის შესაბამის ავტოპარკს, რომლის მსგავსი მუნიციპალიტეტში არასდროს გვქონია. ზუგდიდს უკვე ჰყავს 15 ახალი ავტობუსი და მალე 25 ახალი ავტობუსი დაგვემატება, რომლითაც სარგებლობა შესაძლებელი იქნება როგორც ქალაქში, ისე სოფლებში. პარალელურად აქტიურად მიმდინარეობს გზების მშენებლობა",-აღნიშნა გიგა ფარულავამ.

ახალი ავტობუსები ადაპტირებულია შეზღუდული შესაძლებლობის პირებისთვის და აღჭურვილია კლიმატკონტროლის სისტემით. ავტობუსის გაჩერებებზე დამონტაჟდა ელექტრონული ტაბლოები. ავტოპარკის მოწყობის სამუშაოებისთვის საქართველოს რეგიონში განსახორციელებელი პროექტების ფონდიდან 1 194 495 ლარია გამოყოფილი.