„ლელოს“ ერთ-ერთი ლიდერის, ირაკლი კუპრაძის განცხადებით, ბათუმში "ლელოს" წევრებს მმართველი გუნდის წარმომადგენლები ფიზიკურად გაუსწორდნენ. როგორც ირაკლი კუპრაძე აცხადებს, „ლელოს“ ბათუმის წევრებს ე.წ ხოფას ბაზრობის მიმდებარე ტერიტორიაზე დაესხნენ თავს.

"ოპოზიციის ლიდერებს „ხოფას ბაზრობაზე“ 8 ნოემბრის აქციის მოსაწვევების დარიგების დროს თავს დაგვესხნენ. "ქართული ოცნება" უკვე გადავიდა ქუჩაში ამგარიშგასწორების მეთოდებზე, დაშინებასა და ცემა-ტყეპაზე. ეს აგონია, რაშიც „ოცნება“ იმყოფება, ძალიან მალე უნდა დაასრულოს ქართველმა ხალხმა,"-აცხადებს კუპრაძე.

მისივე განმარტებით, მმართველმა გუნდმა ხალხს სახელმწიფო წაართვა.

"ჩვენ 31 ოქტომბერს წაგვართვეს არჩევნები, ხალხს წაართვეს საკუთარი ხმის ნება, პოლიციამ წაგვართვა და ახლაც ცდილობენ, წაგვართვან თავისუფლება", -განმარტავს კუპრაძე.

ინფორმაციას „ლელოს“ პრესსამსახური ავრცელებს.