ჩინეთი შეეწინააღმდეგება ნებისმიერ ნაბიჯს, რომელიც ძირს უთხრის მის ძირითად ინტერესებს, - ამის შესახებ ჩინეთის საგარეო საქმეთა სამინისტროს პრესსპიკერმა ვონ ვენბინმა განაცხადა, რითაც ტაივანის შესახებ აშშ-ის სახელმწიფო მდივნის მაიკ პომპეოს კომენტარს გამოეხმაურა.
ვენბინმა განაცხადა, რომ ტაივანი ჩინეთის განუყოფელი ნაწილია და რომ პომპეო კიდევ უფრო აზიანებს ჩინეთ-აშშ -ს ურთიერთობებს.
„მთელი სერიოზულობით ვეუბნებით პომპეოს და მის მსგავს პირებს, რომ ნებისმიერ ნაბიჯს, რომელიც ძირს უთხრის ჩინეთის ძირითად ინტერესებს და ჩინეთის საშინაო საქმეებში ჩარევას წარმოადგენს, ჩინეთის მხრიდან მკაცრი კონტრშეტევა მოჰყვება”, - განაცხადა ვონ ვენბინმა.
ჩინეთის საგარეო უწყების პროტესტი პომპეოს გუშინდელ ინტერვიუს მოჰყვა, რომლის დროსაც აშშ-ის სახელმწიფო მდივანმა განაცხადა, რომ „ტაივანი ჩინეთის ნაწილი არასდროს ყოფილა.“
ტაივანის საკითხს ჩინეთი ერთ-ერთ ყველაზე სენსიტიურ და მნიშვნელოვან საკითხად მიიჩნევს აშშ-სთან ურთიერთობებში. აშშ-ის მიერ ტაივანისთვის სხვადასხვა სახის დახმარების აღმოჩენა, მათ შორის იარაღის მიყიდვა, პეკინის უკმაყოფილებას იწვევს.