აფხაზეთი უნდა მოუფრთხილდეს და განავითაროს რუსეთთან ურთიერთობები,- ამის შესახებ ოკუპირებული აფხაზეთის დე ფაქტო პრეზიდენტმა ასლან ბჟანიამ განაცხადა.
მისი თქმით, რუსეთის პრეზიდენტთან რამდენიმე დღის წინ გამართულ შეხვედრაზე, სხვა საკითხებთან ერთად, განიხილეს სომხეთიდან აფხაზეთში და აფხაზეთიდან სომხეთში სარკინიგზო მიმოსვლის საკითხი.
„ხელსაყრელი პირობების არსებობის შემთხვევაში, შესაძლებელია ტრანზიტი. უახლოეს პერიოდში ვითარება გაცილებით გამოიკვეთება და გასაგები გახდება. ამიტომ, ვფიქრობ, ჩვენ დავუბრუნდებით ამ საკითხს ოდნავ მოგვიანებით. ვნახოთ, რა მოხდება მთიანი ყარაბაღის ირგვლივ“ , - განაცხადა ბჟანიამ.
ასლან ბჟანიას განცხადებით, პუტინთან ერთად უსაფრთხოების საკითხებიც განიხილა.
„ის დაინტერესებულია, რომ რუსეთის ირგვლივ იყვნენ მოკავშირე რესპუბლიკები, რომლებიც მისდამი მშვიდობიანად არიან განწყობილები, რაც ძალიან მნიშვნელოვანია“, - განაცხადა დე ფაქტო პრეზიდენტმა.
მისი თქმით, აფხაზეთს გააჩნია უდიდესი მხარდაჭერა რუსეთის სახით, რაც დასაფასებელია და საჭიროა ყველაფერი გაკეთდეს, რომ ქვეყნებს შორის ურთიერთობა განვითარდეს.
2014 წლის ნოემბრის შეთანხმებაზე საუბრისას, ბჟანიას თქმით, შეთანხმდნენ კოორდინირებულ პოლიტიკაზე, თავდაცვის და უსაფრთხოების საერთო სივრცის შექმნასა და საერთო სოციალური და ეკონომიკური სივრცის შექმნაზე.