ბიძინა ივანიშვილს დათმობა აუცილებლად მოუწევს - მას ორი სცენარი აქვს: ან ერთპარტიული, არალეგიტიმური პარლამენტი გააკეთოს ან ახალი არჩევნები დანიშნოს, - ამის შესახებ “ერთიანი ნაციონალური მოძრაობის“ ერთ-ერთმა ლიდერმა ხატია დეკანოიძემ, დღეს გამართულ პრესკონფერენციაზე განაცხადა.

დეკანოიძე ამბობს, რომ “გუშინ ოპოზიციას მოუსმინეს და მათი არგუმენტები მიიღეს“.

“პირველი, რაც ბიძინა ივანიშვილს აშინებს, არის ოპოზიციის ერთიანობა და ჩვენ ვართ ერთიანი - არავინ სხვა ბერკეტების ამოქმედებას არ განიხილავს. გუშინ, სახელმწიფო მდივნის მოადგილესთან შეხვედრისას ცალსახად მოისმინეს ჩვენი არგუმენტები თუ რატომ არ შეიძლება ამ საპარლამენტო ტრიბუნის გამოყენება - ჩვენ წაგვართვეს სამართლის უფლება, წაგვართვეს გასაჩივრების უფლება და ზოგადად, ქვეყანაში არ არსებობს ინსტიტუტი, რომელიც არის თავისუფალი. ჩვენ პარტნიორებთან მუშაობას ვაგრძელებთ. ბიძინა ივანიშვილს დათმობა აუცილებლად მოუწევს - მას აქვს ორი სცენარი: ან ერთპარტიული, არალეგიტიმური პარლამენტი გააკეთოს ან ახალი არჩევნები დანიშნოს, რაც ბევრ ქვეყანაში არის პოლიტიკური კრიზისის განმუხტვის საშუალება. ამაში არაჩვეულებრივი არაფერია“, - განუცხადა ჟურნალისტებს ხატია დეკანოიძემ.