აჭარაში ამომრჩევლის ყველაზე მაღალი აქტივობა ქედაში დაფიქსირდა, ყველაზე დაბალი ბათუმის მაჟორიტარულ ოლქში. „აჭარის რეგიონში დახურულია 300-ვე საარჩევნო უბანი, კენჭისყრის პროცესმა მშვიდ ვითარებაში ჩაიარა, - ამის შესახებ ჟურნალისტებს უმაღლესი საარჩევნო კომისიის საზოგადოებასთან ურთიერთობის განყოფილების უფროსმა, ნესტან ნაკაშიძემ განუცხადა. მისივე განმარტებით, აჭარის ორივე მაჟორიტარულ ოლქში და აჭარის უმაღლესი საბჭოს არჩევნების კენჭისყრაში მონაწილეობა მიიღო 73 833-მა ამომრჩეველმა, რაც არის 30,27%.
"რაც შეეხება 20:00 საათის მდგომარეობით აჭარის რეგიონის 2 მაჟორიტარულ ოლქში ამომრჩეველთა აქტივობას, ბათუმის 28-ე მაჟორიტარულ ოლქში, სადაც ამომრჩეველთა საერთო რაოდენობა არის 147 211, 20:00 საათის მდგომარეობით, კენჭისყრაში მონაწილეობა მიიღო 35 852-მა ამომრჩეველმა, რაც არის 24,35%. 30-ე მაჟორიტარულ ოლქში, სადაც ამომრჩეველთა საერთო რაოდენობა არის 96 681, მონაწილეობა მიიღო 37 981-მა ამომრჩეველმა, რაც არის 39,28%", - განაცხადა ნაკაშიძემ.
მისი თქმით, ყველაზე მაღალი, 52%-იანი აქტივობა დაფიქსირდა ქედის ოლქში, ხოლო, ყველაზე მცირე ბათუმის მაჟორტარულ ოლქში 22%-იანი.