„გორმედმა“ კოვიდინფიცირებული პაციენტების სამკურნალოდ დამატებითი საწოლფონდი გამოყო. გორის საუნივერსიტეტო კლინიკისა და ხაშურის კლინიკის პარალელურად, კოვიდპაციენტების სტაციონარულ მართვაში ჩაერთო ,,გორმედის" ქსელის ქარელის ცენტრალური საავადმყოფოც. დღეის მდგომარეობით, სამედიცინო ქსელ „გორმედს“, გორის, ხაშურის და ქარელის კოვიდკლინიკებში 247 სტაციონარული პაციენტის მართვა შეუძლია (გორში - 111, ხაშურში - 86, ქარელში - 50).
„გორმედის“ კლინიკური დირექტორის, ხათუნა შრუბის ინფორმაციით, ამ დროისთვის, კოვიდკლინიკებში, ახალი კორონავირუსით ინფიცირებული 236 სტაციონარული პაციენტი იმართება.
„ მთლიანობაში, დღეის მდგომარეობით, სამედიცინო ქსელ „გორმედს“, კოვიდკლინიკებში 250-მდე სტაციონარული პაციენტის მართვა შეუძლია. ამ დროისთვის, ,,გორმედის" ქსელის კოვიდკლინიკებში, ახალი კორონავირუსით ინფიცირებული 236 სტაციონარული პაციენტი იმართება და კიდევ რამდენიმე პაციენტის გადმოყვანას ველოდებით. 13-ის მდგომარეობა მძიმეა და ეს პაციენტები მართვით სუნთქვაზე იმყოფებიან.
კოვიდის მართვის პარალელურად, „გორმედის“ ქსელის გორის საუნივერიტეტო კლინიკა, მკაცრი ზონირების დაცვით (დამოუკიდებელი შესასვლელები, გამიჯნული საპალატე სივრცეები) ახორციელებს სხვა გადაუდებელი პათოლოგიების მქონე პაციენტებისთვის ამბულატორიული თუ სტაციონარული სერვისების უწყვეტ რეჟიმში მიწოდებას“, - განაცხადა ხათუნა შრუბმა.