აჭარის მთავრობის სახლთან ოპოზიციური პარტიების ლიდერები და მათი მხარდამჭერები აქციის მსვლელობისას ჯანდაცვის რეკომენდაციებს მაქსიმალურად დაიცავენ, - ამის შესახებ "ერთიანი ნაციონალური მოძრაობის" აჭარის ორგანიზაციის წევრმა გიორგი კირთაძემ ბრიფინგზე განაცხადა.
როგორც მან აღნიშნა, აქციაზე მისული ყველა მოქალაქე თერმოსკრინინგს გაივლის და პირბადეები დაურიგდებათ, ისინი დისტანციის დაცვით განთავსდებიან.
გიორგი კირთაძის თქმით, ოპოზიციური პარტიების მთავარი მოთხოვნაა ხელახალი საპარლამენტო არჩევნები, წინააღმდეგ შემთხვევაში პროტესტის შეწყვეტას არ აპირებენ.
აჭარის მთავრობის სახლთან აქცია დღეს, 15:00 საათზე დაიწყება.
"აქციაზე ყველა შემომსვლელი თერმოსკრინინგს გაივლის, ასევე პირბადეების ტარება სავალდებულო იქნება. ვისაც არ ექნება დავურიგებთ და დისტანციის დაცვით ჩატარდება აქცია. მაქსიმალურად ვიცავთ წესებს და ჩვენი მთავარი მოთხოვნაა, სამართლიანი არჩევნების ჩატარება. ამ ქვეყანას პასუხისმგებლიანი ხელისუფლება უნდა ჰყავდეს. ვინც არ არის რისკ-ჯგუფში ველოდებით. პროტესტი 24- საათიან რეჟიმში გაგრძელდება, რადგან ბიძინა ივანიშვილმა სხვა გზა არ დაგვიტოვა. დღეს კარგად გამოჩნდება, მოქალაქეები და პოლიტიკური პარტიები როგორი პასუხისმგებლობით ეკიდებიან, იმ პრობლემებს, რაც არის ქვეყანაში.
დღევანდელ აქციაზე ეკონომიკასა და ჯანდაცვაზე საინტერესო შეთავაზებები გვექნება", - აღნიშნა გიორგი კირთაძემ.