ნამახვანჰესის წინააღმდეგ რიონის ხეობის მოსახლეობამ მორიგი აქცია გამართა. ადგილობრივები ჰესის მშენებლობის შეჩერებას და კომპანია "ენკას" გასვლას მოითხოვენ.
პროტესტის 35-ე დღეს მოსახლეობამ დახმარებისთვის საქართველოში აშშ-ის საელჩოს მიმართა.
მათი თქმით, საქართველოს ხელისუფლება მათ პროტესტს არ ისმენს, ამიტომ საკითხით დაინტერესებას აშშ-ს ელჩს საქართველოში კელი დეგნანს სთხოვენ.
აქციის მონაწილეებს საყდრისის გადარჩენის კომიტეტის წევრები შეუერთდნენ.
"არ შეწყდება პროტესტი, ვიდრე კომპანია არ დატოვებს ხეობას. მათი განცხადება არის მიუღებელი. ჩვენი ხელისუფლება არის მხარე და არ იცავს მოსახლეობის ინტერესებს, ამიტომ დახმარებისთვის ამერიკის ელჩს მივმართავთ. დაინტერესდეს ჩვენი პროტესტით და მოგვისმინოს. ჩვენ პროტესტს არ შევწყვეტთ" , - განაცხადა აქციის ერთ-ერთმა მონაწილემ ვარლამ გოლეთიანმა.