ბოლო შეხვედრაზე „ქართულმა ოცნებამ“ გვითხრა, რიგგარეშე არჩევნებზეც თანახმა ვართ, ოღონდ ნებისმიერი ფორმით გადავთვალოთ და დაგვიდასტურეთ, რომ 1% მაინც გაყალბდაო, - ამის თაობაზე „მოქალაქეების“ ლიდერმა ალეკო ელისაშვილმა “ფეისბუქ“ მიმართვაში განაცხადა.
ელისაშვილის თქმით, სრული პასუხისმგებლობით შეუძლია ასევე იმის თქმა, რომ მოთხოვნათა 99%-ს, რაც საარჩევნო კომისიასა და საარჩევნო წესებს ეხება, “ქართული ოცნება“ ეთანხმება და ოპოზიციას დასტური მისცა.
„ბოლო შეხვედრაზე „ქართული ოცნება“ მოვიდა და თქვა, რომ ამ პაკეტზე დასტურს გვაძლევდა. პოლიტპატიმრების თემაზე სერიოზული მსჯელობა იყო, მაგრამ ვერ ვილაპარაკებ. ბოლო შეხვედრაზე „ქართულმა ოცნებამ“ გვითხრა, რიგგარეშე არჩევნებზეც თანახმა ვართ - ოთხი საკითხიდან გვითხრეს, რომ ოთხივეზე თანახმა არიან, ოღონდ ნებისმიერი ფორმით გადავთვალოთ და დაგვიდასტურეთ, რომ 1% მაინც გაყალბდაო. როგორც გინდათ ისე დაგვიდასტურეთ. ჩვენ ვთქვით, რომ ცესკოს მონაცემებს ვერ გადავთვლით, რადგან ის უკვე სუს-მა გადახატ-გადააფერადა. კი ბატონო, ოღონდ რასაც ენდობით, ის მოგვიტანეთო. მთელი ერთი თვე რასაც ოპოზიცია ვითხოვდით, რაზეც მოლაპარაკებები მიდის, შეთანხმებული ვართ“, - განაცხადა ალეკო ელისაშვილმა.