უზენაესი სასამართლოს მოსამართლეობის კანდიდატის განცხადებით, სასამართლო საქართველოს სახელმწიფოებრივი ისტორიის განმავლობაში ასეთი დამოუკიდებელი ჯერ არ ყოფილა

უზენაესი სასამართლოს მოსამართლეობის კანდიდატის, ივერი აბაშიძის განცხადებით, სასამართლო საქართველოს სახელმწიფოებრივი ისტორიის განმავლობაში ასეთი დამოუკიდებელი ჯერ არ ყოფილა და სასამართლოს სისტემაში „კლანი" არ არსებობს. ამის შესახებ უზენაესი სასამართლოს მოსამართლეობის კანდიდატმა ივერი აბაშიძემ იუსტიციის უმაღლესი საბჭოს სხდომაზე განაცხადა, როდესაც უპასუხა საბჭოს არამოსამართლე წევრის ნაზი ჯანეზაშვილის მიერ დასმულ შეკითხვას სასამართლოს დამოუკიდებლობასთან დაკავშირებით.

როგორც ივერი აბაშიძემ განმარტა, ის, რომ საქართველოს დღეს დამოუკიდებელი სასამართლო ჰყავს, ბევრმა ფაქტორმა განაპირობა.

„სასამართლო საქართველოს სახელმწიფოებრივი ისტორიის განმავლობაში ამდენად დამოუკიდებელი ჯერ არ ყოფილა. ეს დამოუკიდებლობა განაპირობა ბევრმა ფაქტორმა, მათ შორის, კონკრეტული მოსამართლეების ინდივიდუალურმა დამოუკიდებლობამ, უვადო დანიშვნების საკანონმდებლო დონეზე აწევამ და ა.შ", - განაცხადა ივერი აბაშიძემ.

რაც შეეხება კითხვას, არსებობს თუ არა ე.წ კლანი სასამართლო სისტემაში, ივერი აბაშიძე აცხადებს, რომ დღევანდელ სასამართლოში „კლანურ" მმართველობას ვერ ხედავს.

ამასთან, ნაზი ჯანეზაშვილმა კანდიდატს ჰკითხა, შეუძლია თუ არა გაიხსენოს სასამართლოს მიერ მიღებული ერთი გადაწყვეტილება, რომელიმე რეზონანსულ საქმეზე, რომლითაც გამართლდა საზოგადოების მოლოდინი და გადაარჩინა ქვეყნის დემოკრატია. ივერი აბაშიძემ ამ კითხვის საპასუხოდ სამაუწყებლო კომპანია "რუსთავი 2"-ის საქმე დაასახელა.

გარდა ამისა, ჯანეზაშვილმა კანდიდატს ჰკითხა განემარტა, რას ნიშნავს სტატუსი -პოლიტპატიმრები, რაზეც ივერი აბაშიძემ უპასუხა, რომ „ზოგადად კანონმდებლობით, ასეა, რომ პოლიტიკური მიზნით დაპატიმრებულები". კანდიდატის თქმით, ჰყავს თუ არა საქართველოს „პოლიტიკური პატიმრები", ეს მისი შესაფასებელი არ არის.

„ბატონო ივერი, საქართველოს კანონმდებლობით, პოლიტპატიმრის სტატუსი არ არის განსაზღვრული“, - აღნიშნა ნაზი ჯანეზაშვილმა.

იუსტიციის უმაღლესი საბჭო უზენაესი სასამართლოს მოსამართლეობის ერთ-ერთ კანდიდატთან ივერი აბაშიძესთან ატარებს გასაუბრებას. ის თბილისის საქალაქო სასამართლოს მოსამართლეა. პარლამენტისთვის წარსადგენი კანდიდატების მოსმენის პროცედურა კი უზენაეს სასამართლოში იმართება.

იუსტიციის საბჭოს წევრები საერთო ჯამში 50 კანდიდატს გაესაუბრებიან, აქედან კი პარლამენტს 9 კანდიდატი უნდა წარედგინოს.

დღეისთვის საბჭო გასაუბრებას მხოლოდ 2 კანდიდატთან- ივერი აბაშიძესა და გოჩა აბუსერიძესთან გაივლის.

ანდრო გოცირიძე - პოლიტიკური სარგებლის მიღების მიზნით, მმართველი პარტია არ ერიდება მოსახლეობის დაპირისპირებას, პოლარიზაციის გაღვივებას და აღვირახსნილ ანტიდასავლურ კამპანიასაც კი
მამუკა ხაზარაძე - ცვლილებების დროა! ხელისუფლება, რომელიც ემსახურება რუსეთს, უნდა დასრულდეს! „ლელო“ ემსახურება საქართველოს!
აკადემიკოსი გიორგი ჯაფარიძე - ქვეყანა რომ წარმოდგენილი იყოს მსოფლიოს სამეცნიერო რუკაზე, აუცილებელია მასში მცხოვრები მეცნიერები თავისი საქმიანობით მონაწილეობდნენ საერთაშორისო სამეცნიერო პროცესში
ქართული პრესის მიმოხილვა 28.03.2024
„გავერთიანდეთ ჩვენი გმირებისთვის“ - სილქნეტი დაჭრილ მებრძოლთა თანადგომის ფონდის საქმიანობის ანგარიშს აქვეყნებს
საქართველოს უნივერსიტეტი -  iOS LAB Apple ავტორიზებული სასწავლო ცენტრი
საქართველოს თავდაცვის დილემა - რთული არჩევანი რთულ ვითარებაში
ამერიკული სამედიცინო ჰოლდინგი - CooperSurgical-ი საქართველოში ოვამედის ორგანიზებით სამდღიან სემინარს მართავს