„ქართული ოცნების" წევრი დიმიტრი ხუნდაძე იმედს გამოთქვამს, რომ ოპოზიცია გაითვალისწინებს საზოგადოების დაკვეთას და მეათე მოწვევის პარლამენტის საქმიანობას შეუერთდება.
როგორც მან საკანონმდებლო ორგანოში ჟურნალისტებთან საუბრისას განაცხადა, იმედს იტოვებს, რომ პარლამენტი მრავალპარტიული შემადგენლობით გააგრძელებს მუშაობას.
„დღეს ჩვენ, „ქართულ ოცნებას“ მოგვიწია სრული შემადგენლობით დასწრება სესიის პირველ სხდომაზე. ოპოზიცია არ ჩანს, მაგრამ მე იმედი მაქვს, რომ ისინი შემოვლენ, ეს ქართული საზოგადოების დაკვეთაა, ვის მოწონს, ვის არ მოწონს საზოგადოების გადაწყვეტილება, საზოგადოების გადაწყვეტილებაა, ის უნდა შესრულდეს.
მე იმედს ვიტოვებ, რომ გაითვალისწინებს საზოგადოების დაკვეთას ოპოზიციის ის ნაწილი, რომელიც დღეს არ არის პარლამენტში და შემოვლენ, პარლამენტი გააგრძელებს მრავალპარტიული შემადგენლობით მუშაობას“,-განაცხადა ხუნდაძემ.
კითხვაზე, არის თუ არა ბიძინა ივანიშვილთან შეთანხმებული მინისტრთა კაბინეტის წევრების დანიშვნა, დიმიტრი ხუნდაძე აცხადებს: „თქვენ ჩქარობთ და დაეძებთ სკანდალს. ბიძინა ივანიშვილი არის პარტიის თავმჯდომარე და პარტიის თავმჯდომარე საკადრო გადაწყვეტილებაში პოლიტსაბჭოსთან ერთად რომ ღებულობს მონაწილეობას, არ უნდა იყოს უცხო“.