გომელაური - პანდემიასთან ბრძოლის პარალელურად, მაშველები განაგრძობდნენ სტიქიასთან ეფექტიან ბრძოლას

შინაგან საქმეთა მინისტრის მოვალეობის შემსრულებლის ვახტანგ გომელაურის განცხადებით, ბორჯომში, ჩხოროწყუსა და ანაკლიაში 3 ახალი სახანძრო-სამაშველოს შენობა გაიხსნა. მისივე თქმით, ივნისიდან ყველა მეხანძრე-მაშველს, ისევე, როგორც შინაგან სამინისტროს სხვა დანაყოფების თანამშრომლებს, ხელფასი გაეზარდათ.

"მოგეხსენებათ, პანდემიიდან გამომდინარე, სხვადასხვა უწყებაში არსებული სამსახურების უმეტესი ნაწილი დისტანციურ რეჟიმზე გადავიდა. სამინისტროში არსებობენ სამსახურები, რომელთა მუშაობა დისტანციურად წარმოუდგენელია. ამისი ერთ-ერთი ნათელი მაგალითია საგანგებო სიტუაციების მართვის სამსახური, რომლის შესაძლებლობების გაძლიერება და განვითარება სამინისტროსთვის პრიორიტეტულ მიმართულებად რჩება. 2020 წელს სამსახური 30 ახალი ევროპული სტანდარტის, „ივეკო მაგირუსის“ მარკის სახანძრო-სამაშველო მანქანითა და ახალი ტექნიკური აღჭურვილობით შეხვდა. გაუმჯობესდა ჩვენი მეხანძრე-მაშველების სამუშაო პირობები და წელს პირველად მოხდა ცვლაში მყოფი მეხანძრე-მაშველების კვებით უზრუნველყოფა. წელსვე გაიხსნა 3 ახალი სახანძრო-სამაშველოს შენობა - ბორჯომში, ჩხოროწყუსა და ანაკლიაში. ივნისიდან ყველა მეხანძრე-მაშველს, ისევე, როგორც შინაგან სამინისტროს სხვა დანაყოფების თანამშრომლებს, ხელფასი გაეზარდათ. პანდემიასთან ბრძოლის პარალელურად, მაშველები განაგრძობდნენ ხანძრებთან, სტიქიებთან და უბედურ შემთხვევებთან ეფექტიან ბრძოლას. ყველას ახსოვს რაჭის სტიქია. მეხანძრე-მაშველებმა სტიქიის ზონიდან გამოიყვანეს 706 მოქალაქე, ააგეს დროებითი საბაგირო გზები, რომელთა დახმარებითაც ხდებოდა მედიკამენტებისა და პროდუქტის მიწოდება", - განაცხადა გომელაურმა.

მისივე თქმით, წელს მეხანძრე-მაშველებმა ჩააქრეს რამდენიმე ათეული ტყის ხანძარი.

"სირთულით გამოირჩეოდა სვანეთში გაჩენილი ხანძრები. იყო შემთხვევები, როცა რთული რელიეფის გამო, კერებთან სახანძრო სპეცტექნიკის მისვლა ვერ ხერხდებოდა და ჩვენი მეხანძრე-მაშველები ხშირ შემთხვევაში სამთო აღჭურვილობის გამოყენებით - ქვეითად მიდიოდნენ ცეცხლთან და დღე-ღამის განმავლობაში უწყვეტ რეჟიმში მუშაობდნენ. წელს გვქონდა რამდენიმე ბაზრობის ხანძარი. მათ შორის ლილოში, ელიავაზე, წერეთელზე და ვარკეთილში. ეს უკანასკნელი განსაკუთრებულ საფრთხეს წარმოადგენდა. იყო ავტოგასამართი სადგურის აფეთქების და ხანძრის საცხოვრებელ კორპუსზე გადასვლის საფრთხე.

მეხანძრე-მაშველებმა საკუთარი სიცოცხლის რისკის ფასად მოახერხეს ხანძრის ჩაქრობა.

შავი ზღვის სანაპირო ზოლზე, ივნისიდან აგვისტოს ჩათვლით, მაშველებმა გადაარჩინეს 346 მოქალაქის სიცოცხლე. მინდა მადლობა გადავუხადო საგანგებო სიტუაციების მართვის სამსახურს და თითოეულ მეხანძრე მაშველს", - აღნიშნა გომელაურმა.

ისრაელის ელჩი - საქართველოს ყველა მეგობრისთვის 5 ივლისის მოვლენები აბსოლუტურად შოკისმომგვრელი იყო
ქართული პრესის მიმოხილვა 29.07.2021
კახა გოგოლაშვილი - როცა სტაბილიზაციისკენ მიმართული ნებისმიერი კონსტრუქცია ინგრევა, იქ სამოქალაქო დაპირისპირების საფრთხეც არსებობს
გიორგი ხვედელიანი - ვადამდელი არჩევნების დანიშვნას მიშელის ხელშეკრულება კი არა, ქართველი ხალხის ნება გადაწყვეტს
კომპანია "იორკ თაუერსმა" დავით ტურაშვილთან ერთად ახალი კამპანია წამოიწყო
"სამსუნგის" Bespoke მაცივარი - შექმნილია შენთვის, შენ მიერ (R)
GIZ-ის მხარდაჭერით დაგეგმილია გარემოს ეროვნული სააგენტოს ხელშეწყობა თანამედროვე მონიტორინგული სისტემების დანერგვის პროცესში
„ნიკოს ეზო“ და „ფარდაგები რაჭიდან“ - Social Impact Award-ის ფინალისტები საგანმანათლებლო სფეროდან