ვახტანგ მეგრელიშვილი - უნიკალური მოვლენაა, რომ 2 პარტია იქნება ერთი და იგივე სახელწოდებით

უნიკალური მოვლენაა, რომ 2 პარტია იქნება ერთი და იგივე სახელწოდებით,- ამის შესახებ „გირჩის“ ერთ-ერთმა ლიდერმა ვახტანგ მეგრელიშვილმა ჟურნალისტებთან საუბრისას განაცხადა, სადაც ზურაბ ჯაფარიძის მიერ ახალი „გირჩის" დაფუძნების საკითხზე ისაუბრა.

ვახტანგ მეგრელიშვილის თქმით, უცნობია თუ როგორ განვითარდება პარტია „გირჩთან“ დაკავშირებული მოვლენები.

„26 დეკემბერს, როგორც იცით, უნიკალური მოვლენა იქნება, რომ 2 პარტია იქნება ერთი და იგივე სახელწოდებით. არავინ არ იცის სინამდვილეში, როგორ განვითარდება მოვლენები ჩვენთან დაკავშირებით.

ძალიან დიდი ინტერესით და გულწრფელად ვუსურვებ წარმატებას იმ ადამიანებს, რომლებსაც იგივე მიზნები აქვთ გაცხადებული, რაც მანამდე ჰქონდათ, უბრალოდ, წარმოუდგენიათ, რომ სხვანაირად იმოქმედებენ, თუ ისინი ამ „სხვანაირი მოქმედებით“ წარმატებას მიაღწევენ, მე მხოლოდ გამიხარდება“,-განაცხადა ვახტანგ მეგრელიშვილმა.

შეგახსენებთ, „გირჩის“ ერთ-ერთი ლიდერის, ზურაბ ჯაფარიძის განცხადებით, 26 დეკემბერს, ყრილობა იქნება, სადაც ახალი „გირჩი" დაფუძნდება.

ცნობისთვის, თანაპარტიელებთან გამიჯვნის გადაწყვეტილების შესახებ ზურაბ ჯაფარიძემ რამდენიმე კვირის წინ სოციალურ ქსელში დაწერა. "ერთი მხრივ ჩემი, ხოლო მეორე მხრივ იაგოს, ვახოს და სანდროს გზები გაიყო. აღარ ვაპირებ მათთან ერთად „გირჩის“ კეთებას", - დაწერა ჯაფარიძემ. მოგვიანებით კი, ჯაფარიძემ განაცხადა, რომ „გირჩი“ არ დაუტოვებია და პარტიის ლიდერად რჩება.