ხელისუფლების მზაობა, რომ უნდოდეს კრიზისის განმუხტვა, არ ჩანს. ჩვენ არასდროს გვითქვამს მოლაპარაკებებზე უარი, - ამის შესახებ „ევროპული საქართველოს“ წევრმა ირმა ნადირაშვილმა განაცხადა.

როგორც ნადირაშვილი აღნიშნავს, ხელისუფლება არასწორ ნაბიჯებს დგამს.

„ამ ვითარებაში არ გვაქვს სიახლეები. ოპოზიციას თავისი გეგმების თაობაზე აქვს გამოცხადებული, რომ ყველა საუბარი უნდა იწყებოდეს სწორედ ხელახალი არჩევნების დანიშვნის ქოლგის ქვეშ, სხვა შემთხვევაში ჩვენ არ ვაღიარებთ გაყალბებულ არჩევნებს, არალეგიტიმურ, ერთპარტიულ პარლამენტს.

ხელისუფლების მხარეს არის ბურთი, ისინი უნდა მოვიდნენ, მოიტანონ კონკრეტული წინადადებები სწორედ ამ დათქმებიდან გამომდინარე. ამის ნაცვლად ჩვენ ვხედავთ, რომ ხელისუფლება არასწორ ნაბიჯებს დგამს. პარლამენტში ინიცირება მოხდა კანონპროექტის, სადაც დაფინანსების შეწყვეტაზეა საუბარი და ყველაზე მსხვილი ოპოზიციური პარტიისთვის რეგისტრაციის გაუქმებაზე. ასეთ ვითარებაში ხელისუფლების მზაობა, რომ მას უნდოდეს კრიზისის განმუხტვა, არ ჩანს. ჩვენ მოლაპარაკებებზე უარი არასდროს გვითქვამს“, - განაცხადა ნადირაშვილმა.