ოკუპირებული აფხაზეთის ტერიტორიაზე ხანძრის ახალი კერები ჩნდება. ლოკალური ხანძარი დაფიქსირდა სოფელ ბზიფში. ამის შესახებ „სპუტნიკს“ გაგრის რაიონის ხანძარსაწინააღმდეგო რაზმის ხელმძღვანელმა დავით ბგანბამ განუცხადა.
მისი თქმით, ცეცხლის ჩასაქრობად ადგილზე ორი სახანძრო ბრიგადა მუშაობს.
გაგრაში ხანძარს უკვე რამდენიმე დღეა ებრძვიან. წუხელ, სტიქია საცხოვრებელ სახლებს ას მეტრამდე მიუხლოვდა, რომელიც მეხანძრეებმა ჩააქრეს.
ბგანბას ინფორმაციით, დღეს საღამოსთვის საცხოვრებელი სახლების მიმართულებით ცეცხლის გავრცელების საფრთხე არ არსებობს.
დღესვე ცნობილი გახდა, რომ ხანძარი დაფიქსირდა ახალი ათონის მახლობლად ტყეშიც. ცეცხლს ებრძვიან სატყეო დაცვის თანამშრომლები და ადგილობრივები.