საქართველოს დახმარება ჩვენთვის მიუღებელია, - ამის შესახებ ოკუპირებული აფხაზეთის ე.წ. საგანგებო სიტუაციების მინისტრმა ლევ კვიცინიამ გამოცემა „ეხო კავკაზთან“ ინტერვიუში განაცხადა.
„თქვენგან მესმის პირველად, რომ საქართველო დახმარებას გვთავაზობს, საქართველოს დახმარება ჩვენთვის მიუღებელია, ამიტომ ეს გამოგონილია. არანაირი მოლაპარაკებები, არანირი მცდელობები არ ყოფილა და ვერ იქნება, ქართველებთან ჩვენ არასდროს არანაირი კონტაქტი არ გვქონია“, – განაცხადა კვიცინიამ.
ამასთან, კითხვაზე, მიმართა თუ არა დე ფაქტო ხელისუფლებამ დახმარებისთვის რუსეთს, კვიცინიამ უპასუხა, რომ ამის საჭიროება არ არსებობს.
„ამის საჭიროება არ არის, დასახლებულ პუნქტებს საფრთხე არ ემუქრება. განვმარტავ, ავიაციის მუშაობის ერთი დღე, ეს დაახლოებით 50 ტონა საწვავია, ასეთი რაოდენობის საწვავი ჩვენ არ გვაქვს, ეს შეუძლებელია. ეს აბსოლუტურად მიუწვდომელი თანხებია ჩვენი ქვეყნისთვის. ჩემთვის არაფერია ვერტმფრენის ჩამოყვანა, დავწერ, მოვითხოვ და შემდეგ? რით შევავსებ მას? ის გაფრინდება სოჭში საწვავის შესავსებად და სანამ იქ ჩავა, საწვავი დაუმთავრდება“, – აღნიშნა მან.