გერმანიაში კორონავირუსის პანდემიის გაკონტროლება მიმდინარე წლის ბოლოსთვის გახდება შესაძლებელი, - ამის შესახებ რობერტ კოხის ინსტიტუტის პრეზიდენტმა ლოთარ ვილერმა განაცხადა.

მისივე თქმით, კორონავირუსის ახალი ვარიანტები სიტუაციას ართულებს. ლოთარ ვილერის ინფორმაციით, ამ დროისთვის გერმანიაში ე.წ. „ბრიტანული“ შტამის 16 და „სამხრეთ აფრიკული ვარიანტის“ 4 შემთხვევაა დადასტურებული და ინფიცირებულ მოქალაქეებს საზღვარგარეთ მოგზაურობის ისტორია აქვთ.

„კიდევ მეტი ვარიანტი გვექნება, ამიტომ, ნუ იმოგზაურებთ,“- აღნიშნა ლოთარ ვილერმა.

ცნობისათვის, გასული დღე-ღამის განმავლობაში გერმანიაში კოვიდ 19-ს კიდევ 1 244 ადამიანი ემსხვერპლა, რაც ფატალური შემთხვევების რეკორდულად მაღალი დღიური მაჩვენებელია პანდემიის დაწყების დროიდან.