ბიძინა ივანიშვილი პოლიტიკიდან წავიდა, თუკი მიხეილ სააკაშვილს სურს, რაიმე დასკვნა გააკეთოს, მაშინ ჩამოვიდეს საქართველოში ისე, როგორც ნავალნი ჩავიდა მოსკოვში, - აღნიშნული განცხადება დღეს პარლამენტში, საკანონმდებლო ორგანოში „პატრიოტთა ალიანსის” სიით შესულმა და ამჟამად „ევროპელი სოციალისტების” წევრმა, დეპუტატმა ფრიდონ ინჯიამ გააკეთა.
ინჯიას თქმით, ის ოპოზიციის პარლამენტში შესვლას მიესალმება და მათთან თანამშრომლობისთვის მზად არის. ინჯიას შეფასებით, ოპოზიციური პარტიები უახლოეს წლებში გაქრებიან, თუკი ბოიკოტს გამოუცხადებენ პარლამენტსა და მომდევნო ადგილობრივ არჩევნებს.
„რაც შეეხება საკითხს იმის შესახებ, უნდა იყოს თუ არა ოპოზიცია პარლამენტში, ჩვენ, ჩვენი გადაწყვეტილებით პარლამენტის მუშაობაში ვმონაწილეობთ. თუ დანარჩენი ოპოზიციური პარტიები პარლამენტში შემოსვლას და საპარლამენტი ტრიბუნის გამოყენებას გადაწყვეტენ, მათ გადაწყვეტილებას დიდი სიამოვნებით მივესალმებით. პარლამენტში რაც მეტი იქნება ოპოზიციური პარტიების რაოდენობა, მით უფრო მეტი ძალა გვექნება, ვიყოთ მმართველი პარტიის ოპონენტები", - განუცხადა ჟურნალისტებს ინჯიამ.