რუსეთის საპარლამენტო დელეგაცია, ფედერაციის საბჭოს საერთაშორისო საკითხების კომიტეტის თავმჯდომარე კონსტანტინ კოსაჩოვის ხელმძღვანელობით, ხვალ, 5 თებერვალს ცხინვალის ოკუპირებულ რეგიონში ჩავა , - ამის შესახებ ცხინვალის ე.წ. პარლამენტის „პირველმა ვიცე-სპიკერმა“ პეტრე გასიევმა განაცხადა.

მისი თქმით, დელეგაციის შემადგენლობაში 5 რუსი დეპუტატი იქნება.

გასიევმა ასევე განაცხადა, რომ „ვიზიტის“ ფარგლებში გაიმართება საპარლამენტთაშორისო თანამშრომლობის კომისიის სხდომა და ისაუბრებენ საკითხებზე, რომელთა რეალიზაციაში რუსეთი ე.წ. „სამხრეთ ოსეთს“ ეხმარება.

„საპარლამენტთაშორისო თანამშრომლობას დიდი სარგებლობა მოაქვს ჩვენი ხალხებისთვის, ამ კომისიის საშუალებით შეგვიძლია, გარკვეული პრობლემური საკითხები გადავჭრათ. ამ ყველაფრის მიზანი ჩვენი ხალხის კეთილდღეობაა და ამ მუშაობისაგან დიდ შედეგებს ველით“, - განაცხადა პეტრე გასიევმა.

ოკუპირებული ცხინვალის ე.წ. პარლამენტსა და რუსეთის ფედერაციის საბჭოს შორის შეთანხმებას 2008 წლის სექტემბერში მოეწერა ხელი.