„რესპუბლიკური პარტიის“ წევრი თამარ კორძაია აცხადებს, რომ ოპოზიცია გადაწყვეტილების შეცვლას და პარლამენტში შესვლას არ აპირებს. ამის შესახებ თამარ კორძაიამ ჟურნალისტებთან საუბრისას განაცხადა.

"ოპოზიციას აქვს ცალსახად გაცხადებული - რიგგარეშე არჩევნების თანხმობის გარეშე პარლამენტში არ შევიდეს",-აცხადებს კორძაია.

რაც შეეხება ნიკა მელიას საქმეს, როგორც კორძაია დასძენს, "ნიკა მელიას დევნის სერიალი გრძელდება".

"გადავდივართ მეორე სეზონზე. ვხედავთ, რომ ხელისუფლება პოლიტიკურ დევნას პოლიტიკური ლიდერების მიმართ აგრძელებს",- დასძენს კორძაია.

ცნობისთვის, პროკურატურა ნიკა მელიას მიმართ პატიმრობის გამოყენების შუამდგომლობასთან დაკავშირებული თანხმობის მისაღებად პარლამენტს მიმართავს. შეგახსნებთ, 5 თებერვალს, საქართველოს გენერალურმა პროკურატურამ „ერთიანი ნაციონალური მოძრაობის“ თავმჯდომარე ნიკა მელია გააფრთხილა და განმარტა, რომ თუკი ის გირაოს არ გადაიხდის, პროკურატურა სასამართლოს მისთვის აღკვეთის ღონისძიების სახით პატიმრობის შეფარდების შუამდგომლობით მიმართავს. პროკურატურა მელიასთვის აღკვეთის ღონისძიების სახით შეფარდებული გირაოს 40 000 ლარის გადახდას, ან აღნიშნული თანხის ექვივალენტური უძრავი ქონებით გირაოს უზრუნველყოფას ითხოვს. ნიკა მელია 20 ივნისის საქმეზე ჯგუფური ძალადობის ხელმძღვანელობის და მასში მონაწილეობისათვის, საქართველოს სისხლის სამართლის კოდექსის 225-ე მუხლის 1-ელი და მე-2 ნაწილებით, სისხლის სამართლის პასუხისგებაში მიეცა და მას სასამართლომ აღკვეთის ღონისძიების სახით 40 000-ლარიანი გირაო შეუფარდა. ასევე მას აეკრძალა ბრალდების მხარის წინასწარი ინფორმირებისა და თანხმობის გარეშე სახელმწიფო საზღვრის გადაკვეთა.