ნინო წილოსანი საფრანგეთის ელჩს დიეგო კოლასს შეხვდა

აგრარულ საკითხთა კომიტეტის თავმჯდომარემ ნინო წილოსანმა საქართველოში საფრანგეთის რესპუბლიკის ელჩთან დიეგო კოლასთან გაცნობითი ხასიათის შეხვედრა გამართა, სადაც მხარეებმა ორმხრივი ურთიერთობების აქტუალური საკითხები განიხილეს.

როგორც „ინტერპრესნიუსს“ საქართველოს პარლამენტიდან აცნობეს, შეხვედრაზე მხარეებმა ძირითადი ყურადღება აგრარული მიმართულებით თანამშრომლობის საკითხებზე გაამახვილეს და სამომავლო თანამშრომლობის გეგმებიც დასახეს.

„ერთმანეთს ის საკითხები და პრიორიტეტები გავაცანით, რომლებზეც ერთი მხრივ კომიტეტი, მეორე მხრივ, საფრანგეთის მთავრობა მუშაობს. მოხარული ვარ, რომ მრავალი გადაკვეთის წერტილი ვნახეთ. ის ბიზნესწარმომადგენლობა და საექსპერტო ჯგუფები, რომლებიც აგრარული მიმართულებით მუშაობენ ჩვენს ქვეყანაში, რა თქმა უნდა, ძალიან კარგი რესურსია იმისთვის, რომ ურთიერთთანამშრომლობით ევროპული სტანდარტები მივიღოთ და დავნერგოთ. შეხვედრაზე ყურადღება დავუთმეთ ასევე ორ ქვეყანას შორის თანამშრომლობის გააქტიურებას განათლების სექტორში აგრომიმართულებით. საუნივერსიტეტო დონეზე ეს კავშირები არსებობს და ვისაუბრეთ, თუ როგორ გავაღრმაოთ ეს ურთიერთობები სამომავლოდ სტუდენტების გაცვლითი პროგრამების მეშვეობით. ბუნებრივია, შეხვედრაზე ყურადღება დაეთმო ორი ქვეყნის პარლამენტებს შორის თანამშრომლობის საკითხებს, რაც დაგვეხმარება, რომ კიდევ უფრო მეტი კოორდინაცია გვქონდეს სხვადასხვა, მათ შორის, აგრარული სექტორის მიმართულებით. შესაბამისად, დავსახეთ თანამშრომლობის კონკრეტული ნაბიჯები“, - განაცხადა ნინო წილოსანმა.

ინფორმაციაში აღნიშნულია, რომ შეხვედრას ასევე ესწრებოდა აგრარულ საკითხთა კომიტეტის თავმჯდომარის პირველი მოადგილე ალექსანდრე მოწერელია.

ალექსანდრე თვალჭრელიძე - ქართულმა პოლიტიკურმა სისტემამ მდგრადობა დაკარგა და გარე ჩარევის გარეშე მისი გამოსწორება შეუძლებელია
ქართული პრესის მიმოხილვა 05.03.2021
სტეპან გრიგორიანი - რუსეთი ჩქარობს სამხრეთ კავკასიაში დასავლეთთან შედარებით უპირატესობის მიღწევას
მინდია დავითაძე - საამაყოა, როცა WIPO-ს გენერალური დირექტორის მხრიდან დადებითად ფასდება საქპატენტის საქმიანობა
სილქნეტი განცხადებას ავრცელებს (R)