ოკუპირებული ცხინვალის ე.წ. „პრეზიდენტი“ ანატოლი ბიბილოვი 3-დღიანი „ვიზიტით“ რუსეთის ფედერაციაში იმყოფება, - ამის შესახებ ინფორმაციას ბიბილოვის „პრესსამსახური“ ავრცელებს.
„მოსკოვში ვიზიტის ფარგლებში დაგეგმილია ანატოლი ბიბილოვის შეხვედრა რუსეთის ოფიციალურ პირებთან. შეხვედრის დროს რუსეთის ფედერაციასა და სამხრეთ ოსეთის რესპუბლიკას შორის სოციალურ-ეკონომიკური თანამშრომლობის საკითხებს განიხილავენ“, - აღნიშნულია ინფორმაციაში.
აღსანიშნავია, რომ ბიბილოვი მოსკოვს ოკუპირებულ ცხინვალში არსებული პოლიტიკური კრიზისის ფონზე ეწვია. ზოგიერთი დეპუტატი ბოიკოტს უცხადებს პარლამენტის სხდომებს და ე.წ. „გენერალური პროკურორის“ ურუზმაგ ჯაგაევის გადადგომას და ცხინვალის მკვიდრის, ინალ ჯაბიევის მკვლელობის სამართლიან გამოძიებას ითხოვს. გარდა ამისა, ე.წ. „ხელისუფლების“ ოპონენტები ამჟამინდელ „ხელისუფლებას“ არალეგიტიმურად თვლიან.