„ქართული ოცნების” ოფისში უმრავლესობის სხდომა მიმდინარეობს. როგორც სხდომის დაწყებამდე საპარლამენტო უმრავლესობის დეპუტატმა, თამარ ტალიაშვილმა განაცხადა, მმართველი პარტია ქვეყანაში მიმდინარე ყველა საკითხს განიხილავს, ასევე განიხილავენ იმ საკითხებს, რომელიც პარლამენტში, სასესიო კვირაზე იქნება განხილული.

,,უმრავლესობის სხდომა სისტემატიურად იმართება, ყოველთვის განვიხილავთ მიმდინარე საკითხებს სასესიო კვირის წინ და იმ საკითხებს, რომელიც პარლამენტის სხდომებზე იქნება განხილული. ყველა მიმდინარე საკითხთან დაკავშირებით ვმსჯელობთ, განსაკუთრებულ თემატიკაზე, რომელიც უმრავლესობის სხდომის შემდეგ ეცნობა მოსახლეობას”, - აღნიშნა თამარ ტალიაშვილმა.

მან ,,ნაციონალური მოძრაობის” თავმჯდომარე ნიკა მელიას საქმეზეც ისაუბრა. მისი თქმით, სტრატეგიული პარტნიორების პოზიცია, რომ ჩვენს ქვეყანაში აუცილებელია სტაბილური განვითარება და დეესკალაცია, მნიშვნელოვანი გზავნილია ასევე იმ ,,რადიკალური ოპოზიციისათვის, რომელიც სამწუხაროდ არ დგამს ნაბიჯებს, რომ პარლამენტში შემოვიდეს”.

,,მე ვთვლი, რომ ნიკა მელიას საქმე არის სამართლებრივი პროცესი და უნდა გაგრძელდეს სამართლებრივი განხილვის ჩარჩოში. ჩვენი სტრატეგიული პარტნიორები აფიქსირებენ თავიანთ პოზიციას, რომ ჩვენს ქვეყანაში აუცილებელია სტაბილური განვითარება და დეესკალაცია. ეს მნიშვნელოვანი გზავნილია ასევე იმ რადიკალური ოპოზიციისათვის, რომელიც სამწუხაროდ არ დგამს ნაბიჯებს, რომ პარლამენტში შემოვიდეს და კონსტრუქციულ რეჟიმში - საკანონმდებლო ორგანოში გააგრძელოს დებატები”, - განაცხადა თამარ ტალიაშვილმა.