შეუძლებელია რაიმე წარმატებულ ნაბიჯზე საუბარი, თუ არ იქნება თავისუფალი გადაადგილება და ამით შეილახება ადამიანის ფუნდამენტური უფლება, - ამის შესახებ, ერგნეთში, ინციდენტების პრევენციისა და მათზე რეაგირების მექანიზმის ფორმატში გამართული რიგით 98-ე შეხვედრის დასრულების შემდეგ, სუს-ის საინფორმაციო-ანალიტიკური დეპარტამენტის დირექტორის მოადგილემ, ირაკლი ანთაძემ ოკუპირებული ახალგორის საკითხზე კომენტირებისას განაცხადა.
ირაკლი ანთაძის ინფორმაციით, ცენტრალური ხელისუფლების წარმომადგენლებმა დააფიქსირეს პოზიცია, რომ კოვიდრეგულაციების სრული დაცვით, გაიხსნას და აღდგეს თავისუფალი გადაადგილება ახალგორიდან ცენტრალური ხელისუფლების კონტროლირებად ტერიტორიაზე.
„რაც შეეხება ახალგორის მოსახლეობას, გადაადგილების უკანონოდ შეზღუდვამ შეუქმნა არსებითი პრობლემები, ვინაიდან, მოსახლეობა და ცალკეული პირები, რომლებიც საჭიროებენ ადეკვატურ სამედიცინო დახმარებას ცენტრალური ხელისუფლების მიერ კონტროლირებად ტერიტორიაზე, ისინი ამ შესაძლებლობას არიან მოკლებულნი. ამ საკითხზე მსჯელობა გვქონდა, ჩვენი პოზიციაა, რომ კოვიდრეგულაციების სრული დაცვით, გაიხსნას და აღდგეს თავისუფალი გადაადგილება. შეუძლებელია რაიმე წარმატებულ ნაბიჯზე საუბარი, თუ არ იქნება თავისუფალი გადაადგილება და ამით შეილახება ადამიანის ფუნდამენტური უფლება", - განაცხადა ირაკლი ანთაძემ. ინციდენტების პრევენციისა და მათზე რეაგირების მექანიზმის სამუშაო ჯგუფის მომდევნო, რიგით 99-ე შეხვედრა ერგნეთში 23 აპრილს გაიმართება.