ნებისმიერი ვაქცინის პროგრამის შემთხვევაში ანაფილაქსიურ შოკზე კეთდება განსაკუთრებული აქცენტი და მისი მართვა ეს არის ყველაზე ბაზისური უნარ-ჩვევა, რაც ყველა ექიმს აქვს, - ასე უპასუხა ჯანდაცვის მინისტრის მოადგილემ თამარ გაბუნიამ ბრიფინგზე ჟურნალისტის კითხვას, იყვნენ თუ არა ექიმები გადამზადებული და მზად იმისთვის, რომ მსგავსი ფაქტი დადგებოდა.

მისი თქმით, დაავადებათა კონტროლის ცენტრმა და ჯანდაცვის სამინისტრომ დამატებით ახალი პროტოკოლი მოამზადეს, სადაც აღწერილია როგორ უნდა მოხდეს ანაფილაქსიური შოკის რისკების შეფასება და რა შემთხვევაში რა ქმედება უნდა განხორციელდეს.

„ანაფილაქსიური შოკი ეს არის პირველი ყველაზე მნიშვნელოვანი რეაქცია, რისთვისაც ნებისმიერი ვაქცინაციის პროგრამა ემზადება გამონაკლისის გარეშე. ანაფილაქსიური შოკის თემა არ გაჩნდა ჩვენ სინამდვილეში კოვიდის ვაქცინიდან გამომდინარე. ნებისმიერი ვაქცინის პროგრამის შემთხვევაში ანაფილაქსიურ შოკზე კეთდება განსაკუთრებული აქცენტი და მისი მართვა ეს არის ყველაზე ბაზისური უნარ-ჩვევა, რაც ყველა ექიმს აქვს, თუმცა მიუხედავად ამისა, დაავადებათა კონტროლის ცენტრმა და ჯანდაცვის სამინისტრომ ალერგოლოგების მონაწილეობით მოამზადეს კიდევ დამატებით ახალი პროტოკოლი, სადაც დეტალურად არის აღწერილი ანაფილაქსიური შოკის რისკების შეფასება როგორ უნდა მოხდეს და რა შემთხვევაში რა ქმედება უნდა განხორციელდეს. მთავარი ინტერვენცია ეს არის მედიკამენტური მკურნალობა ადრენალინით, რაც მარტივად ხელმისაწვდომია და ყველა აცრის კაბინეტს აქვს. ყველა ის ჩარევა, რომელიც პროტოკოლში არის აღწერილი, გუშინდელი ინფორმაციით, რომელიც რეგულირების სააგენტომ მოიპოვა, ჩატარებულია. ამასთან დაკავშირებით, ექსპერტების ჯგუფი კიდევ ატარებს დამატებით მოკვლევას. პროტოკოლში მითითებული ინტერვენციები ჩვენ გუშინდელ დასკვნაში უკვე არის ასახული როგორც ჩატარებული ინტერვენცია და პასუხი იმ რეაქციაზე, რაც აღინიშნა ძალიან მალე ვაქცინაციის შესრულებიდან“ , - განაცხადა გაბუნიამ.