მიანმარში უსაფრთხოების ძალების მიერ დღეს მოკლული მომიტინგეების რაოდენობა 91-მდე გაიზარდა, - ამის შესახებ ინფორმაციას Reuters-ი საინფორმაციო პორტალ Myanmar Now-ზე დაყრდნობით ავრცელებს.
სააგენტო წერს, რომ დღევანდელი დღე ყველაზე სისხლიანი დღეა ქვეყანაში 1 თებერვალს მომხდარი სამხედრო გადატრიალების შემდეგ. აღსანიშნავია, რომ ქვეყანაში დღეს „შეიარაღებული ძალების დღე“ აღინიშნება.
მომიტინგეების მიმართ გამოჩენილ ძალადობას მიანმარში ევროკავშირის დელეგაცია გამოეხმაურა.
„მიანმარის შეიარაღებული ძალების 76-ე იუბილე დარჩება, როგორც ტერორისა და უსინდისობის დღე. შეუიარაღებელი მშვიდობიანი მოქალაქეების, მათ შორის ბავშვების მკვლელობა უპატიებელი ქმედებებია,“- ნათქვამია დელეგაციის მიერ გავრცელებულ განცხადებაში.
გავრცელებული ინფორმაციით, მიანმარში თებერვლის დასაწყისიდან მიმდინარე საპროტესტო აქციების დროს მინიმუმ 400 ადამიანია მოკლული.
ცნობისათვის, აშშ-მა და ევროკავშირმა მიანმარში სამხედრო გადატრიალებასთან დაკავშირებულ პირებს სანქციები დაუწესეს. ევროკავშირმა სამხედრო გენერალს, მინ ან ჰლაინს, 9 სამხედრო ოფიცერსა და საარჩევნო კომისიის ხელმძღვანელს აქტივები გაუყინა და სავიზო შეზღუდვები დაუწესა.
აშშ-ის სახაზინო დეპარტამენტმა კი სანქციები დაუწესა მიანმარის პოლიციის უფროსსა და არმიის სპეციალური ოპერაციების ხელმძღვანელს. მათი განცხადებით, ისინი პასუხისმგებლები იყვნენ დემონსტრანტების წინააღმდეგ ძალის გამოყენებაზე, რასაც ლეტალური შედეგები მოჰყვა.