ბუნებრივი და გასაგებიც არის ოპოზიციის შფოთვა და წუხილი, რომ სულ ბიძინა ივანიშვილის აჩრდილს ხედავდეს, - ასე პასუხობს საპარლამენტო უმრავლესობის წევრი ალუდა ღუდუშაური ჟურნალისტების კითხვას „ქართული ოცნების“ პარტიულ დაფინანსებაში ბიძინა ივანიშვილის მონაწილეობის შესახებ.
ალუდა ღუდუშაურის განცხადებით, მოქალაქეებს აქვთ შესაძლებლობა, დააფინანსონ ის პოლიტიკური ძალა, რომელიც მის მიზნებთან ყველაზე ახლოს დგას.
„ბატონმა ბიძინამ განაცხადა, რომ ის წავიდა პოლიტიკიდან და თქვენ ხედავთ, რომ ამის შემდეგ ერთი განცხადებაც არ გაუკეთებია, ერთ პოლიტიკურ აქტივობაში არ მიუღია მონაწილეობა, განსხვავებით სხვა პოლიტიკურად ანგაჟირებული ოპოზიციური ლიდერებისგან, რომლებიც ჩვენს ქვეყანას თავს არ ანებებენ. ამიტომ ბიძინა ივანიშვილს თქვენ ბუნებრივია, ხედავთ, ყველა იმ მოქალაქეში, რომელსაც მიაჩნია, რომ „ქართული ოცნება“ არის სწორედ ის ძალა, რომელიც ხალხთან ყველაზე ახლოს არის, ხალხის ინტერესებზე ორიენტირებულია და ბუნებრივია, ოპოზიციის რომელიმე წარმომადგენლის შფოთვა და წუხილი, რომ სულ ბიძინა ივანიშვილის აჩრდილს ხედავდეს, ეს გასაგებიც არის და არ მიკვირს, რომ ეს კითხვები ისმოდეს. ჩვენი ქვეყნის მოქალაქეს ვინ აუკრძალა, რომ დააფინანსოს ის პოლიტიკური ძალა, რომელიც მის მიზნებთან და ამოცანებთან ყველაზე ახლოს არის,“ - განაცხადა ღუდუშაურმა.