"ქართული ოცნების" წევრებმა 9 აპრილის მემორიალი გვირგვინით შეამკეს. პარლამენტთან, 9 აპრილის მემორიალთან იმყოფებოდნენ არჩილ თალაკვაძე, ირაკლი კობახიძე, კახა კალაძე, შალვა პაპუაშვილი და სხვები.

"9 აპრილი არის დღე, რომელიც ტრაგიკულად ჩაიწერა საქართველოს ისტორიაში. 9 აპრილი არის დღე, რომელმაც მთელი ერი გააერთიანა და ეროვნული ერთობის სიმბოლოდ იქცა. 9 აპრილი არის დღე, როდესაც დამოუკიდებლობა მოვიპოვეთ და მინდა, ამ ყველაფრისთვის ჩვენს გმირებს დიდი მადლობა გადავუხადო", - განაცხადა ქართული ოცნების გენერალურმა მდივანმა კახა კალაძემ.

ცნობისთვის, 1989 წლის 9 აპრილის ტრაგედიიდან 32 წელი შესრულდა. 1989 წლის 9 აპრილს, გამთენიისას, საბჭოთა კავშირის შეიარაღებული ძალების ნაწილებმა თბილისის ცენტრში, პარლამენტის შენობასთან, მშვიდობიანი საპროტესტო აქცია დაარბიეს, რასაც მსხვერპლი მოჰყვა. დარბევის შედეგად 21 ადამიანი დაიღუპა. პარლამენტის წინ შეკრებილი ათასობით მოქალაქე დაუდგენელი შემადგენლობის გაზით მოიწამლა. 1991 წლის 9 აპრილს მაშინდელმა უზენაესმა საბჭომ საქართველოს სახელმწიფოებრივი დამოუკიდებლობის აღდგენა გამოაცხადა.