პრეზიდენტის სასახლეში, დამოუკიდებლობის აღდგენის 30 წლისთავისადმი მიძღვნილ ღონისძიებაზე, სალომე ზურაბიშვილმა დათა ვანიშვილი სიკვდილის შემდეგ მედლით „სამოქალაქო თავდადებისათვის“ დააჯილდოვა. მედალი დათა ვანიშვილის ოჯახს გადაეცა.
როგორც პრეზიდენტმა აღნიშნა, დათა ვანიშვილი არის სიმბოლო იმ უსამართლობის და გაუსაძლისი მდგომარეობის, რომელშიც ჩვენი თანამემამულეები ცხოვრობენ.
„ეს დღე იმთავითვე შევარჩიეთ იმისთვის, რომ პატივი მიგვეგო ადამიანისთვის, რომელიც გახდა ერთგვარი სიმბოლო შემართებისა და შეუგუებლობის. დავით ვანიშვილის სახელი შემოვიდა ჩვენს ისტორიაში და არის სიმბოლო იმ უსამართლობის და იმ გაუსაძლისი მდგომარეობის, რომელშიდაც ცხოვრობენ ჩვენი თანამემამულეები ამ საოკუპაციო ხაზის ორივე მხარეს. დღეს მინდა, რომ მის ოჯახს გადავცე პრეზიდენტის მედალი, როგორც ნიშანი ჩვენი უდიდესი პატივისცემის და ჩვენი იმედის, რომ ამ სიტუაციას გადავლახავთ, საქართველო გამთლიანებული იქნება და ასეთი ადამიანები თავიანთ სოფლებში მშვიდად იქნებიან და აღარ ექნებათ ის აუცილებლობა, რომ ამ უსამართლობას გაუძლონ", - განაცხადა პრეზიდენტმა.