ჩვეულებრივი მონური სისტემაა, ეს არის ფარსი, ამაზრზენი და ძირგამომპალი მართლმსაჯულება, - ასე აფასებს „ერთიანი ნაციონალური მოძრაობის“ წევრი ხატია დეკანოიძე მოსამართლის გადაწყვეტილებას ნიკა მელიას პატიმრობაში დატოვებასთან დაკავშირებით.
დეკანოიძის თქმით, დღევანდელი გადაწყვეტილებით კიდევ ერთხელ დადასტურდა, რომ ნიკა მელია პოლიტპატიმარია.
„წარმოუდგენელი ფარსია, რაც ჩვენ მოვისმინეთ, იმიტომ, რომ მთელი ამ ხნის განმავლობაში „ქართული ოცნება“ და მათ შორის პროკურორებიც ამბობდნენ, რომ გირაო გადაიხადოს და შემდეგ გამოვიდეს ციხიდანო. ამის შემდეგ კი, პატიმრობაში რჩება ნიკა მელია და მოსამართლემ პროკურორის შუამდგომლობა გაითვალისწინა. ჩვეულებრივი მონური სისტემაა, ეს არის ფარსი, ამაზრზენი და ძირგამომპალი მართლმსაჯულება. ნიკა მელია არის პოლიტიკური პატიმარი და დღეს ამ პროცესით კიდევ ერთხელ დადასტურდა, თუ რამხელა სიყალბესთან და ფარსთან გვაქვს საქმე.
ახლა ძალიან მნიშვნელოვანია და აუცილებელი ის, რომ ჩვენ და ჩვენმა საერთაშორისო პარტნიორებმა სერიული ზეწოლა გააგრძელონ, რაც აუცილებლად მოხდება“ , - განაცხადა დეკანოიძემ.
ცნობისთვის, „ერთიანი ნაციონალური მოძრაობის“ თავმჯდომარე ნიკა მელია კვლავ პატიმრობაში რჩება. აღნიშნული გადაწყვეტილება თბილისის საქალაქო სასამართლოს მოსამართლე ნინო ჩახნაშვილმა რამდენიმე წუთის წინ გამოაცხადა.