„ევროპული საქართველოს“ წევრის ტარიელ ლონდარიძის განცხადებით, 15 მაისს ოპოზიციის მიერ დაგეგმილ აქციაზე დიდი რაოდენობით ხალხის შეკრების შემთხვევაში, „ქართული ოცნება“ იძულებული იქნება დანიშნოს ვადამდელი არჩევნები და გაათავისუფლოს პოლიტპატიმრები.
მისი თქმით, 15 მაისის აქციისთვის მობილიზება იწყება.
„ხვალ, აჭარაში დაგეგმილია შეხვედრები. ასეთი შეხვედრები გაგრძელდება,ზუგდიდში, იმერეთში და ყველა რეგიონი იქნება მოცული. ამავდროულად „ევროპული საქართველო“ თავის რეგიონული ორგანიზაციების მეშვეობით შეხვედრებს გააგრძელებს ამომრჩევლებთან და მათ მობილიზებას დაიწყებს, იმისთვის, რომ 15 მაისს ხალხმრავალი აქცია ჩატარდეს. „ქართულ ოცნებას“, ბიძინა ივანიშვილს სხვა ენა არ ესმის. 15 მაისს დიდი რაოდენობით მოსახლეობის შეკრების შემთხვევაში, ნაბიჯებს უკან გადადგამს და გაათავისუფლებს პოლიტპატიმრებს და იძულებული იქნება დანიშნოს ვადამდელი არჩევნები“, - აცხადებს ტარიელ ლონდარიძე.