დღეს ევროპის საბჭოს საპარლამენტო ასამბლეის საგაზაფხულო სესია იხსნება. როგორც ევროსაბჭოს ოფიციალურ ვებ-გვერდზე გამოქვეყნებულ ინფორმაციაშია აღნიშნული, სესია ჰიბრიდულ ფორმატში, 19-22 აპრილს ჩატარდება და მასში მონაწილეობას გერმანიის კანცლერი ანგელა მერკელი და ევროპის სახელმწიფო მინისტრი მაიკლ როთიც მიიღებენ.
საპარლამენტო ასამბლეას სიტყვით მიმართავენ ევროპარლამენტის თავმჯდომარე დავიდ სასოლი, მოლდოვის რესპუბლიკის პრეზიდენტი მაია სანდუ და ორგანიზაციის გენერალური მდივანი მარია პეიჩინოვიჩ-ბურიჩი.
სესიის დღის წესრიგში შედის ევროსაბჭოს სტრატეგიული პრიორიტეტებისა და ხედვების შესახებ დებატების გამართვა და ასევე ერთობლივი დებატები ბელარუსში ადამიანის უფლებების დარღვევებსა და ქვეყანაში საარჩევნო რეფორმის აუცილებლობაზე.
ამასთან, მოთხოვნილია საგანგებო დებატები რუსი ოპოზიციონერის, ალექსეი ნავალნის დაკავების, თურქეთში დემოკრატიული ინსტიტუტების ფუნქციონირების, კოვიდ პასპორტებისა და მოწმობების საკითხებზე, ასევე დებატები რუსეთის, როგორც ევროპაში მშვიდობის წინააღმდეგ მიმართული საფრთხის თემაზე.