საქართველოს პარლამენტის არჩეული წევრის, პოლიტიკოს სალომე სამადაშვილის განცხადებით, ევროპარლამენტის წევრებს თხოვნით მიმართა, ნიკა მელიას თავდებობის შესახებ.
როგორც სამადაშვილი ამბობს, შეთანხმების ტექსტში ფორმულირება ყველა შესაძლო გზას ითვალისწინებს ნიკა მელიას გასათავისუფლებლად.
“იმედია, საქართველოს ხელისუფლებას ეყოფა ნებისყოფა და დათანხმდება ამ წინადადებას. ვუერთდები “ლელოს” ინიციატივას და მეც თხოვნით მივმართე ევროპარლამენტის წევრების ჯგუფს, ნიკა მელიას თავდებობის შესახებ. ცხადია, ასევე მზად ვარ მას თავდებში პირადად დავუდგე. აღსანიშნავია, რომ შეთანხმების ტექსტში ფორმულირება ითვალისწინებს ყველა შესაძლო გზას ნიკას გასათავისუფლებლად, არა მხოლოდ გირაოს და ამნისტიას”, - წერს სალომე სამადაშვილი.
ცნობისთვის, „ლელოს“ ინფორმაციით, პარტიის ლიდერებმა ევროპარლამენტარებს შესთავაზეს, ევროპელი პარლამენტარები თავდებში დაუდგნენ ნიკა მელიას, რათა დაუყოვნებლივ შეიცვალოს მისი აღკვეთის ღონისძიება და მელია გათავისუფლდეს. მათი განმარტებით, ევროპელი პარლამენტარები მზად არიან, ჩაერთონ ამ ინიციატივაში და თავდებში დაუდგნენ ნიკა მელიას.