სალომე სამადაშვილი - სააკაშვილმა რაც უნდა გააცნობიეროს არის ის, რომ ალტერნატივა - ის ან ბიძინა აღარ არის რელევანტური

სააკაშვილმა რაც უნდა გააცნობიეროს არის, რომ ალტერნატივა ან ის ან ბიძინა, ეს აღარ არის რელევანტური, - ამის შესახებ სალომე სამადაშვილმა „პალიტრანიუსის“ გადაცემაში „პოლიტ-ქალაქი“ განაცხადა.

როგორც მან აღნიშნა, ბიძინა ივანიშვილის მმართველობის შეცვლას მრავალპოლუსიანი პოლიტიკური სპექტრი სჭირდება.

„მე მითქვამს ადრეც, სააკაშვილის როლი არის მნიშვნელოვანი, რადგან სრულიად განსაკუთრებული მოვლენაა, რომ ადამიანი ამდენი წელია არ არის საქართველოში, მაგრამ ჰყავს ფაქტიურად ყველაზე მრავალრიცხოვანი ოპოზიციური ამომრჩეველი, მაგრამ ამავე დროს, ეს ამომრჩეველი არ იზრდება. ამიტომ სწორი ფორმულა იქნებოდა, რომ მას საკუთარი პოლიტიკური ჩართულობისთვის ისეთი გზა მოეძებნა, რომელიც ხელს შეუწყობდა ქვეყანაში ოპოზიციის გაძლიერებას. ეს გზა, ჩემი აზრით, პირველ რიგში კარგი იქნებოდა იმით დავიწყოთ, რომ განსხვავებული ოპოზიციური პარტია არ იქნას შერაცხული ხელისუფლებასთან გარიგებულად, ეს სწორი დასაწყისი იქნებოდა, განსაკუთრებით როცა უხერხულ მდგომარეობაში ვარდები და მერე გიწევს იმ ხალხთან თანამშრომლობა, რომლებსაც გარიგებულებს ეძახდი რამდენიმე კვირის თუ დღის წინ.

სააკაშვილმა რაც უნდა გააცნობიეროს არის, რომ ალტერნატივა - ან ის ან ბიძინა, ეს აღარ არის რელევანტური ქართულ პოლიტიკურ სპექტრში. ანუ ორპოლუსიანობა ქართულ პოლიტიკურ სპექტრში არ არის არც რელევანტური და არც იმას ეხმარება, რომ ბიძინა ივანიშვილის რეჟიმი ქვეყანაში შეიცვალოს არჩევნების გზით, მათ შორის, რაც, ჩემი აზრით, არის აუცილებელი. ობიექტურად, რა რეალობასაც ვუყურებთ ჩვენ უკვე 9 წელია არის მარტივი - ბიძინა ივანიშვილის დამარცხებას სჭირდება მრავალპოლუსიანი პოლიტიკური სპექტრი და არა ორი სიმძიმის ცენტრი. ეს ნამდვილად ასეა და ამას აჩვენებს ყველა არჩევნების შედეგები“, - განაცხადა სამადაშვილმა.

კითხვაზე, აქვს თუ არა მიხეილ სააკაშვილს ხელისუფლებაში კიდევ ერთხელ მოსვლის შანსი, სამადაშვილი პასუხობს, რომ მისი აზრით, „ნაციონალური მოძრაობა იქნება მნიშვნელოვანი პარტნიორი მომავალში კოალიციურ ხელისუფლებაში.

მისივე თქმით, სააკაშვილს რაც შეეხება, „ვნახოთ, როგორ ჩამოყალიბდება მისი და „ნაციონალური მოძრაობის“ ზოგადად მომავალი პოლიტიკური გეგმები.“

სამადაშვილის თქმით, გაჩნდა შანსი, რომ ხელისუფლება ხელმეორედ შეიცვალოს არჩევნების გზით.

რაც შეეხება შეთანხმების დოკუმენტზე ხელმოწერას, სამადაშვილის განცხადებით, მიუხედავად იმისა, რომ სააკაშვილმაც განაცხადა, დოკუმენტზე ხელმოწერის შესახებ, ის არ გამხდარა საკუთარი თანაპარტიელების თავდასხმის ობიექტი, მისგან განსხვავებით.

„სააკაშვილი არის გამოცდილი პოლიტიკოსი და აქვს პოლიტიკური ალღო, ამ შემთხვევაში ვფიქრობ, იმიტომ რომ არ არის საქართველოში, ძალიან დისტანცირებული არის ამ პროცესებისგან, შეიძლება დრო სჭირდება, რომ გააცნობიეროს, რა არის სწორი ნაბიჯი, რადგან ალბათ, მასაც სხვადასხვა ინფორმაციას აწვდიან, მაგრამ საბოლოო ჯამში, მან სწორი განცხადება გააკეთა, როცა განაცხადა, რომ „ერთიანმა ნაციონალურმა მოძრაობამ“ ამ ხელშეკრულებას ხელი უნდა მოაწეროს, მას ესმის და ორი ადამიანია ვინც ხელი მოაწერა - გრიგოლ ვაშაძე და მე და ჩვენ ალბათ, ყველაზე კარგად გვესმის საერთაშორისო კონტექსტი, რომელშიც ქვეყანას უწევს არსებობა და საერთაშორისო კონტექსტი, ვფიქრობ, სააკაშვილსაც ესმის“, - აღნიშნა სამადაშვილმა.

ხათუნა ლაგაზიძე - თუ ოპოზიციას რაციონალიზმი კი არა, თვითგადარჩენის ინსტინქტი მაინც შერჩენია, მოუწევთ გაერთიანება იმ საფრთხის წინააღმდეგ, რასაც ასპარეზზე ახალი პოლიტიკური ჯგუფების გამოჩენა ჰქვია
ქართული პრესის მიმოხილვა 07.05.2021
რამაზ საყვარელიძე - ოპოზიციიდან ბევრი შეეცდება სააკაშვილისგან გამიჯვნას და ლიდერის როლის მორგებას, მეეჭვება ეს წარმატებული მცდელობა იყოს, ამ ოპოზიციისთვის რთული იქნება სააკაშვილის დამარცხება
„გაგუას კლინიკაში“ covid 19–ის საწინააღმდეგო ვაქცინაციის კაბინეტი გაიხსნა
ბაქოში ევროპის ჩემპიონატის თასი ჩაიტანეს