მე ვერ ვხედავ სიძლიერეს საპარლამენტო ინსტიტუტში, როცა მმართველი ძალა ყოველმხრივ გაუგებარი მიზეზების გამო ცვლის პარლამენტის თავმჯდომარეს, - ამის შესახებ ჟურნალისტებთან უმრავლესობიდან გასულმა დეპუტატმა ბექა ლილუაშვილმა განაცხადა.
მისი თქმით, არჩილ თალაკვაძის ჩანაცვლება კუჭავას კანდიდატურით მისთვის მოულოდნელი იყო.
„კახა კუჭავას კანდიდატურას რატომ არ დავუჭირეთ მხარი, ასე არ დავსვამდი კითხვას, ზოგადად კანდიდატურას არ დავუჭირეთ მხარი. ჩვენ ვართ ქვეყანა, რომელსაც მმართველი გუნდის მხრიდან აქვს გაცხადებული და აღებული პასუხისმგებლობა, რომ 2024 წელს აკეთებს განაცხადს ევროკავშირის წევრობაზე, რაც პირველ რიგში, მოიაზრებს ძლიერ სახელმწიფო ინსტიტუტებს, მე ვერ ვხედავ სიძლიერეს საპარლამენტო ინსტიტუტში, როცა მმართველი ძალა ყოველმხრივ გაუგებარი მიზეზების გამო ცვლის პარლამენტის თავმჯდომარეს და თავის პარტიის წევრებსაც ამ ინფორმაციას ბოლო წუთამდე არ უმხელს, ამიტომ ჩემთვის ეს მიუღებელია“, - განაცხადა ლილუაშვილმა.
შეგახსენებთ, რომ საპარლამენტო უმრავლესობის წევრის შალვა პაპუაშვილის განცხადებით, მიუხედავად იმისა, რომ პარლამენტის თავმჯდომარის არჩევისას კენჭისყრა ფარული იყო, 6 დეპუტატი, რომელმაც კახა კუჭავას არჩევას მხარი არ დაუჭირა, ლოგიკურად „ქართული ოცნებიდან“ გასული დამოუკიდებელი დეპუტატები არიან.
როგორც ის სოციალურ ქსელში წერს, მათმა ყოფილმა თანაგუნდელებმა პირველივე გადაწყვეტილების მიღებისას როგორც ადამიანური, ასევე პოლიტიკური შეცდომა დაუშვეს.