ყველანაირად ცდილობენ, სახე შეუნარჩუნდეს ბრალდებულ ნიკანორ მელიას, მაგრამ კანონდამრღვევებს, რომლებიც კანონს არღვევენ და სახელმწიფოს პატივს არ სცემენ, ვერაფერი გაათეთრებს, - ამის შესახებ იურიდიულ საკითხთა კომიტეტის თავმჯდომარე ანრი ოხანაშვილმა ამნისტიის შესახებ ოპოზიციის ალტერნატიულ პროექტზე საუბრისას, ჟურნალისტებთან განაცხადა.

როგორც ოხანაშვილმა აღნიშნა, ამ კანონპროექტით ოპოზიციას მათ მიერ აღებული პასუხისმგებლობა დაზარალებულ მოქალაქეებზე გაადააქვთ, რაც მათი მხრიდან უპასუხისმგებლობაა.

„ჩნდება ლეგიტიმური ეჭვები, რომ ამ ადამიანებს არ სურთ შეთანხმებით ნაკისრი ვალდებულებების აღსრულება, ვინაიდან დააინიცირეს კანონპროექტი, რომლითაც მათ მიერ აღებული პასუხისმგებლობა, სურთ, რომ გადაიტანონ მოქალაქეებზე, დაზარალებულებს შეახოცონ ხელი - მორიგდებიან თუ არა ისინი პოლიციელთან ან პოლიციელი მოურიგდება თუ არა დაზარალებულს. ეს არის პრობლემა, ეს არის უპასუხისმგებლობა ამ კონკრეტული ჯგუფების მხრიდან, ვინაიდან შეთანხმებაში წერია, რომ ამნისტია უნდა შეეხოს ყველა პირს 20 ივნისის მოვლენებთან დაკავშირებით,"- განაცხადა ოხანაშვილმა.

რაც შეეხება საკითხს, უნდა შეეხოს თუ არა 20 ივნისთან დაკავშირებით მომავალში შესაძლო გამოკვეთილ დანაშაულებსაც, ოხანაშვილი აცხადებს, რომ ეს შეთანხმების ტექსტში ნათლად წერია.

„შეთანხმების ტექსტში წერია, რომ ამნისტია უნდა შეეხოს ყველა სამართალდარღვევას, ოპოზიციის წარმომადგენლებსაც რომ მოუსმინოთ, ოთარ კახიძე სალომე სამადაშვილს ეკამათებოდა ამას წინათ იმაზე, რომ არსად წერია, რომ ვინმე უნდა გამოირიცხოს, ამიტომ თვითონ გაარკვიონ. შეთანხმებაში ნათლად წერია, რომ ყველა სამართალდარღვევა 20 ივნისთან დაკავშირებით უნდა ამნისტირდეს. ეს ნიშნავს, რომ ეს რთული და მძიმე ფურცელი უნდა გადაიშალოს,"- განაცხადა ოხანაშვილმა.